ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠣᠶᠢᠯᠡᠴᠢᠯᠡᠭᠡ
ᠰᠣᠶᠣᠯ ᠡᠷᠳᠡᠨᠢ
ᠵᠠᠭᠤᠨ ᠰᠤᠨᠳᠠᠯᠠᠭᠰᠠᠨ ᠠᠪᠤᠷᠭᠤ ᠵᠤᠬᠢᠶᠠᠯ᠂ ᠠᠷᠢᠭᠤᠨ ᠭᠡᠭᠡᠨ ᠳᠤᠷᠠᠳᠬᠠᠯ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2018/5/9
                                     ᠠᠯᠳᠠᠨᠵᠢᠭᠠᠰᠤ         ᠠᠭᠤᠤ ᠰᠤᠳᠤᠨ ᠡᠷᠳᠡᠮᠳᠠᠨ ᠪᠠᠭᠰᠢ ᠮᠢᠨᠢ ᠳᠡᠯᠡᠭᠡᠢ ᠶᠢᠨ ᠭᠡᠭᠡᠷᠡᠯ ᠢ ᠤᠭᠳᠤᠨ ᠡᠷᠳᠡᠮ ᠰᠤᠶᠤᠯ ᠤᠨ ᠮᠦᠷ ᠭᠦᠭᠡᠭᠡᠵᠦ᠂ ᠬᠦᠭᠵᠢᠭᠰᠡᠨ ᠬᠠᠷᠢ ᠶᠠᠫᠤᠨ ᠤᠯᠤᠰ ᠲᠤ ᠤᠴᠢᠵᠦ᠂ ᠳᠠᠪᠰᠢᠩᠭᠤᠢ ᠰᠤᠶᠤᠯ ᠪᠤᠯᠪᠠᠰᠤᠷᠠᠯ ᠢ ᠰᠤᠷᠤᠨ ᠰᠤᠳᠤᠯᠵᠦ᠂ ᠤᠭᠰᠠᠭ᠎ᠠ ᠦᠨᠳᠤᠰᠤᠳᠠᠨ ᠤ ᠬᠦᠰᠡᠯ ᠮᠦᠷᠦᠭᠡᠳᠦᠯ ᠢ ᠪᠠᠶᠡᠯᠡᠬᠦᠯᠬᠦ ᠪᠠᠷ ᠳᠡᠭᠡᠳᠦᠰ ᠤᠨ ᠰᠦᠷ ᠢᠶᠠᠨ ᠳᠠᠬᠢᠨ ᠪᠠᠳᠠᠷᠠᠭᠤᠯᠬᠤ ᠡᠷᠡᠯᠭᠡᠭ ᠵᠤᠷᠢᠭ ᠢᠶᠠᠷ ᠨᠢᠭᠡᠨ ᠵᠠᠭᠤᠨ ᠤ ᠳᠤᠷᠰᠢ ᠬᠦᠮᠦᠨ ᠤ ᠶᠠᠪᠤᠭ᠎ᠠ ᠦᠭᠡᠢ  ᠶᠢ ᠶᠠᠪᠤᠵᠦ᠂ ᠰᠡᠳᠬᠢᠭᠡ ᠦᠭᠡᠢ ᠶᠢ ᠰᠡᠳᠬᠢᠵᠦ᠂ ᠬᠡᠯᠡᠭᠡ ᠦᠭᠡᠢ ᠶᠢ ᠬᠡᠯᠡᠵᠦ᠂ ᠪᠢᠴᠢᠭᠡ ᠦᠭᠡᠢ ᠶᠢ ᠪᠢᠴᠢᠵᠦ᠂ ᠦᠨᠳᠤᠰᠤᠳᠠᠨ ᠢᠶᠠᠨ ᠰᠡᠭᠡᠭᠡᠷᠡᠬᠦᠯᠬᠦ ᠮᠠᠰᠢ ᠤᠯᠠᠨ ᠨᠤᠮ ᠵᠤᠬᠢᠶᠠᠯ ᠢ ᠪᠢᠴᠢᠭᠰᠡᠨ ᠴᠤᠷ ᠤᠨ ᠭᠠᠭᠴᠠ ᠡᠷᠳᠡᠮᠳᠠᠨ ᠭᠡᠵᠦ ᠬᠡᠯᠡᠬᠦ ᠳᠤ ᠢᠯᠡᠬᠦᠳᠠᠬᠦ ᠦᠭᠡᠢ᠃ ᠡᠶᠢᠨᠬᠦ ᠳᠤᠷᠠᠰᠤᠨ ᠶᠠᠷᠢᠬᠤ ᠳᠤ ᠬᠦᠮᠦᠨ ᠤ ᠭᠡᠯᠡᠳᠡᠭ ︽ᠡᠷᠳᠡᠮᠳᠠᠨ᠂ ᠠᠯᠳᠠᠷᠳᠦ ᠰᠢᠯᠦᠭᠴᠢ ᠨᠠ᠊ ᠰᠠᠶᠢᠨᠴᠤᠭᠳᠤ︾ ᠭᠡᠬᠦ ᠳᠤᠮᠤ ᠦᠭᠡ ᠬᠡᠷᠡᠭᠯᠡᠬᠦ ᠦᠭᠡᠢ᠂  ︽ᠮᠢᠨᠦ ᠪᠠᠭᠰᠢ ᠰᠠᠶᠢᠴᠤᠩᠭ᠎ᠠ︾ ᠭᠡᠵᠦ ᠦᠪᠠᠷ ᠤᠨ ᠪᠤᠳᠤᠯ ᠢᠶᠠᠨ ᠶᠠᠷᠢᠮᠠᠷ ᠪᠠᠶᠢᠨ᠎ᠠ᠃          ᠪᠠᠭᠰᠢ ᠮᠢᠨᠢ ᠶᠠᠫᠤᠨ ᠤᠯᠤᠰ ᠲᠤ ᠰᠤᠷᠤᠯᠴᠠᠵᠦ ᠪᠠᠶᠢᠬᠤ ᠳᠠᠭᠠᠨ ᠬᠦᠭᠵᠢᠭᠰᠡᠨ ᠤᠯᠤᠰ ᠤᠨ ᠰᠤᠶᠤᠯ ᠰᠤᠷᠭᠠᠨ ᠬᠦᠮᠦᠵᠢᠯ ᠢ ᠪᠠᠭ᠋ᠠᠷᠬᠠᠵᠦ᠂ ᠬᠦᠨ ᠬᠦᠨᠵᠡᠭᠡᠢ ᠰᠤᠷᠴᠦ ᠰᠤᠳᠤᠯᠵᠦ ᠡᠷᠳᠡᠮ ᠡᠪᠤᠷᠯᠠᠨ ᠡᠭᠡ ᠤᠯᠤᠰ ᠲᠠᠭᠠᠨ ᠢᠷᠡᠵᠦ᠂ ᠦᠨᠳᠤᠰᠤᠳᠠᠨ ᠤ ᠰᠤᠶᠤᠯ ᠰᠤᠷᠭᠠᠨ ᠬᠦᠮᠦᠵᠢᠯ ᠳᠤ ᠦᠨ᠎ᠡ ᠲᠠᠢ ᠴᠡᠨ᠎ᠠ ᠲᠠᠢ ᠪᠢᠴᠢᠭ ᠮᠠᠲ᠋ᠧᠷᠢᠶᠠᠯ ᠢ ᠳᠤᠭᠤᠷᠪᠢᠨ ᠪᠢᠴᠢᠵᠦ᠂ ᠳᠠᠷᠢᠬᠦᠨ ᠨᠤᠶᠠᠨ ᠤ ᠬᠡᠪᠯᠡᠯ ᠳᠠᠷᠤᠮᠠᠯᠠᠯ ᠤᠨ ᠤᠷᠳᠤᠨ ᠳᠤ ᠬᠡᠪᠯᠡᠬᠦᠯᠵᠦ ᠪᠠᠶᠢᠭᠰᠠᠨ ᠶᠤᠮ᠃ ᠳᠠᠷᠠᠴᠢᠯᠠᠨ ᠤᠯᠤᠰ ᠪᠠᠶᠢᠭᠤᠯᠤᠭᠳᠠᠭᠰᠠᠨ ᠠᠴᠠ ᠨᠠᠰᠢ ︽ᠪᠠᠶᠠᠷ ᠤᠨ ᠳᠠᠭᠤᠯᠠᠯ︾ ᠠᠴᠠ ᠡᠬᠢᠯᠡᠨ ᠨᠠᠮ ᠳᠦᠷᠦ ᠪᠠᠨ ᠮᠠᠭᠳᠠᠭᠰᠠᠨ ᠠᠯᠢ ᠤᠯᠠᠨ ᠤᠶᠠᠩᠭ᠎ᠠ ᠳᠠᠭᠤᠯᠠᠯ᠂ ᠵᠤᠬᠢᠶᠠᠯ  ᠂ ᠤᠷᠴᠢᠭᠤᠯᠭ᠎ᠠ ᠶᠢᠨ ᠤᠯᠠᠨ ᠨᠤᠮ ᠤᠨ ᠬᠦᠷᠦᠩᠭᠡ  ᠲᠠᠢ ᠬᠦᠮᠦᠨ ᠶᠤᠮ᠃ ᠳᠠᠷᠠ ᠪᠦᠬᠦᠢ ᠨᠤᠮ ᠵᠤᠬᠢᠶᠠᠯ ᠢ ᠪᠦᠷᠢᠨ ᠴᠤᠭᠯᠠᠭᠤᠯᠪᠠᠯ ᠳᠠᠬᠢᠨ ᠨᠢᠭᠡ ᠨᠠᠢᠮᠠᠨ ᠪᠤᠳᠢ ᠪᠤᠯᠬᠤ  ᠪᠠᠷ ᠰᠤᠶᠤᠯ ᠤᠨ ᠦᠪ ᠦᠯᠡᠳᠡᠭᠡᠭᠰᠡᠨ ᠬᠦᠮᠦᠨ ᠶᠤᠮ᠃        ︽ᠭᠡᠭᠡᠷ᠎ᠡ ᠶᠢᠨ ᠭᠠᠯᠠᠭᠤ ᠨᠢᠰᠦᠭᠡᠳ ᠬᠦᠷᠬᠦ ᠦᠭᠡᠢ ᠭᠠᠵᠠᠷ ᠠᠴᠠ ᠬᠦᠮᠦᠨ ᠤ ᠬᠦᠦ ᠡᠷᠳᠡᠮ ᠡᠪᠤᠷᠯᠠᠨ ᠢᠷᠡᠬᠦ︾ ᠳᠤ ᠮᠤᠩᠭᠤᠯ ᠤᠨ ᠰᠡᠭᠡᠭᠡᠷᠡᠭᠰᠡᠨ ᠸᠠᠩ ᠳᠠᠮᠴᠤᠭᠳᠤᠩᠷᠤᠪ ᠤᠭᠳᠤᠨ ᠬᠦᠯᠢᠶᠡᠵᠦ᠂ ᠭᠡᠪᠯᠡᠯ ᠳᠠᠷᠤᠮᠯᠠᠯ ᠤᠨ ᠤᠷᠳᠤᠨ ᠤ ᠨᠠᠷᠢᠨ ᠪᠢᠴᠢᠭᠡᠴᠢ ᠪᠤᠯᠭᠠᠵᠦ᠂ ᠦᠭᠢᠳ ᠤᠨ ᠬᠦᠮᠦᠵᠢᠯ ᠬᠢᠭᠡᠳ ᠪᠦᠰᠡᠬᠦᠶᠢᠴᠤᠳ ᠤᠨ ᠤᠩᠰᠢᠬᠤ ᠪᠢᠴᠢᠭ ᠢ ᠨᠠᠶᠢᠷᠠᠭᠤᠯᠬᠤ ᠡᠬᠦᠷᠭᠡ ᠦᠭᠴᠦ᠂ ᠳᠦᠰᠢᠮᠡᠯ ᠤᠨ ᠪᠠᠶᠢᠷᠢ ᠳᠡᠭᠡᠷ᠎ᠡ ᠬᠠᠶᠢᠷ᠎ᠠ ᠶᠢᠨ ᠮᠠᠶᠢᠷᠠᠨ ᠳᠤᠰᠢᠶᠠᠯ ᠳᠤ ᠳᠠᠪᠰᠢᠭᠤᠯᠤᠭᠰᠠᠨ ᠭᠡᠳᠡᠭ᠃ ᠳᠤᠬᠠᠢ ᠶᠢᠨ ᠹᠸᠤᠳᠠᠯ ᠤᠨ ᠨᠠᠶᠢᠭᠡᠮ ᠤᠨ ᠡᠭᠡᠳᠡᠷᠭᠡᠨ ᠪᠤᠳᠤᠯᠢᠶᠠᠨ ᠲᠠᠢ ᠴᠠᠭ ᠦᠶ᠎ᠡ ᠪᠤᠯᠪᠠᠴᠦ ᠦᠨᠳᠤᠰᠤᠳᠠᠨ ᠤ ᠰᠤᠷᠭᠠᠨ ᠬᠦᠮᠦᠵᠢᠯ ᠤᠨ ᠦᠢᠯᠡᠰ ᠲᠤ ᠵᠢᠷᠦᠭᠡᠨ ᠳᠠᠮᠢᠷ ᠢᠶᠠᠨ ᠰᠢᠪᠬᠠᠵᠦ᠂ ᠬᠠᠭᠤᠴᠢᠨ ᠬᠡᠷ ᠤᠨ ᠰᠤᠷᠭᠠᠭᠤᠯᠢ ᠶᠢᠨ ᠬᠢᠴᠢᠶᠡᠯ ᠬᠦᠮᠦᠵᠢᠯ ᠤᠨ ᠰᠤᠷᠬᠤ ᠨᠤᠮ ᠴᠦᠭᠡᠨ ᠪᠠᠶᠢᠵᠦ᠂ ︽ᠪᠤᠭᠳᠠ ᠶᠢᠨ ᠰᠤᠷᠭᠠᠯ  ᠤᠨ ᠠᠷᠪᠠᠨ ᠵᠢᠷᠭᠤᠭ᠎ᠠ︾᠂ ︽ᠺᠦᠩᠽᠢ ᠮᠧᠩᠽᠢ ᠶᠢᠨ ᠰᠤᠷᠭᠠᠯ︾ ᠢ ᠤᠩᠰᠢᠨ ᠴᠡᠭᠡᠵᠢᠯᠡᠬᠦ ᠳᠠᠳᠤᠢ ᠦᠭᠡᠢ᠂ ︽ᠦᠬᠢᠨ ᠬᠦᠮᠦᠨ ᠤ ᠶᠤᠰᠤ ᠵᠢᠷᠤᠮ︾᠂ ︽ᠪᠦᠰᠡᠬᠦᠢ ᠬᠦᠮᠦᠨ ᠤ ᠠᠷᠬᠠᠭ ᠭᠡᠮ︾  ᠭᠡᠬᠦ ᠬᠠᠭᠤᠴᠢᠨ ᠰᠤᠷᠭᠠᠨ ᠬᠦᠮᠦᠵᠢᠯ ᠤᠨ ᠭᠡᠪᠰᠢᠮᠡᠯ ᠳᠦᠷᠢᠮ ᠢ ᠰᠢᠨᠡᠴᠢᠯᠡᠵᠦ᠂ ᠰᠢᠨ᠎ᠡ ᠮᠢᠩᠭᠠᠨ ᠤ ᠰᠤᠷᠭᠠᠭᠤᠯᠢ ᠶᠢᠨ ᠬᠦᠷᠢᠶᠠᠨ ᠤ ᠰᠤᠶᠤᠯ ᠪᠤᠯᠪᠠᠰᠤᠷᠠᠯ᠂ ᠬᠢᠴᠢᠶᠡᠯ ᠬᠦᠮᠦᠵᠢᠯ ᠢ ᠦᠷᠭᠡᠳᠭᠡᠵᠦ᠂ ᠳᠡᠦᠭᠡ ᠪᠠᠶᠢᠭᠠᠯᠢ ᠭᠠᠵᠠᠷ ᠵᠦᠢ ᠶᠡᠷᠤ ᠶᠢᠨ ᠮᠡᠳᠡᠯᠭᠡ᠂ ᠳᠠᠭᠤᠤ ᠤᠷᠠᠯᠢᠭ᠂ ᠵᠢᠷᠤᠭ᠂ ᠪᠠᠶ᠎ᠠ ᠳᠠᠮᠢᠷ᠂ ᠶᠠᠫᠤᠨ ᠤ ᠤᠳᠤᠬᠢᠴᠢᠯᠡᠠᠭᠰᠠᠨ ᠪᠠᠶ᠎ᠠ ᠳᠠᠮᠢᠷ ᠤᠨ ᠪᠤᠯᠪᠠᠰᠤᠷᠠᠯ᠂ ᠵᠢᠭᠰᠠᠵᠦ ᠠᠯᠬᠤᠬᠤ᠂ ᠳᠠᠮᠢᠷ ᠤᠨ ᠤᠬᠠᠭᠠᠨ ᠢ ᠤᠶᠠᠯᠳᠠᠭᠤᠯᠤᠨ ᠴᠤ᠋ ᠰᠢᠨ᠎ᠡ ᠳᠦᠪᠰᠢᠨ ᠳᠤ ᠬᠦᠷᠭᠡᠭᠰᠡᠨ ᠪᠠᠶᠢᠨ᠎ᠠ᠃ ᠡᠩ ᠳᠡᠷᠢᠬᠦᠨ ᠳᠤ ᠰᠤᠷᠭᠠᠭᠤᠯᠢ ᠶᠢᠨ ᠬᠦᠷᠢᠶᠠᠨ ᠤ ᠰᠤᠷᠬᠤ ᠨᠤᠮ ︽ᠠᠶᠢᠯ ᠢᠶᠠᠨ ᠦᠭᠡᠳᠡᠯᠡᠬᠦᠯᠬᠦ ᠪᠢᠴᠢᠭ  ︾ ᠢ ᠨᠠᠶᠢᠷᠠᠭᠤᠯᠵᠦ ᠰᠤᠷᠬᠤ ᠶᠢᠨ ᠡᠮᠦᠨ᠎ᠡ ᠬᠦᠮᠦᠨ ᠪᠤᠯᠬᠤ ᠶᠢ ᠰᠤᠷᠭᠠᠵᠦ᠂ ᠢᠷᠡᠭᠡᠳᠦᠢ ᠶᠢᠨ ᠡᠭᠡ ᠬᠦᠮᠦᠨ ᠤ ᠤᠶᠤᠨ ᠤᠬᠠᠭᠠᠨ ᠰᠤᠶᠤᠯ ᠪᠤᠯᠪᠠᠰᠤᠷᠠᠯ ᠢ ᠡᠵᠡᠮᠰᠢᠬᠦᠯᠬᠦ ᠳᠠᠳᠤᠢ ᠦᠭᠡᠢ ᠪᠦᠰᠡᠬᠦᠶᠢᠴᠤᠳ ᠤᠨ ᠤᠩᠰᠢᠬᠤ ᠪᠢᠴᠢᠭ᠂ ︽ᠠᠶᠢᠯ ᠭᠡᠷ ᠬᠢᠭᠡᠳ ᠪᠦᠰᠡᠬᠦᠢ ᠬᠦᠮᠦᠨ᠂ ᠠᠶᠢᠯ ᠭᠡᠷ ᠬᠢᠭᠡᠳ ᠤᠭᠰᠠᠭ᠎ᠠ ᠦᠨᠳᠤᠰᠤᠳᠠᠨ︾ ᠭᠡᠬᠦ ᠳᠤᠮᠤ ᠵᠤᠬᠢᠶᠠᠯ ᠢ ᠨᠠᠶᠢᠷᠠᠭᠤᠯᠵᠦ᠂ ᠦᠨᠳᠤᠰᠤᠳᠠᠨ ᠢᠶᠠᠨ ᠭᠡᠭᠡᠷᠡᠬᠦᠯᠦᠨ ᠳᠡᠯᠡᠭᠡᠢ ᠶᠢᠨ ᠳᠠᠪᠴᠠᠩ ᠳᠤ ᠮᠦᠷ ᠵᠡᠷᠭᠡᠴᠠᠨ ᠤᠷᠤᠭᠰᠢᠯᠠᠬᠤ ᠦᠵᠡᠯ ᠤᠬᠠᠮᠰᠠᠷ ᠡᠷᠴᠢ ᠬᠦᠴᠦ ᠶᠢ ᠤᠯᠭᠤᠵᠦ᠂ ᠡᠭᠡ ᠰᠤᠷᠭᠠᠭᠤᠯᠢ ᠶᠢᠨ ᠳᠡᠦᠭᠡ ᠶᠢ ᠵᠢᠷᠤᠭᠯᠠᠵᠦ ᠦᠯᠡᠳᠡᠭᠡᠭᠰᠡᠨ ᠶᠤᠮ᠃ ᠳᠠᠷᠡᠴᠢᠯᠠᠨ ᠴᠠᠭᠠᠨ ᠳᠤᠯᠤᠭᠠᠢ ᠶᠢᠨ ᠠ ᠠᠴᠠ ᠡᠬᠢᠯᠡᠨ  ︽ᠠᠰᠠᠷᠠᠯ ᠡᠨᠡᠷᠢᠯ ᠤᠨ ᠳᠤᠷᠠᠰᠢᠯ ᠶᠡᠭᠡᠳᠠᠢ᠂ ᠠᠭᠠᠯᠢ ᠳᠤᠩᠭᠠᠯᠠᠭ ᠬᠦᠮᠦᠨ ᠪᠤᠯᠵᠠᠭᠠᠶ᠎ᠠ ᠁︾ ᠭᠡᠬᠦ ᠵᠠᠭᠤᠨ ᠪᠠᠳᠠᠭ ᠰᠢᠯᠦᠭ ᠤᠨ ᠵᠤᠬᠢᠶᠠᠯ ᠨᠠᠶᠢᠷᠠᠭᠤᠯᠵᠦ ᠮᠤᠩᠭᠤᠯ ᠪᠦᠰᠡᠬᠦᠢ ᠡᠭᠡ ᠬᠦᠮᠦᠨ ᠤ ᠡᠷᠬᠢᠮ ᠳᠡᠭᠡᠳᠦ ᠬᠡᠪ ᠰᠤᠷᠳᠠᠯ᠂ ᠤᠶᠠᠷᠠᠭᠤᠨ ᠤᠶᠠᠬᠠᠨ ᠵᠠᠩ ᠠᠷᠠᠨᠰᠢᠨ᠂ ᠠᠶᠢᠯ ᠭᠡᠷ᠂ ᠠᠵᠦ ᠠᠮᠢᠳᠤᠷᠠᠯ ᠤᠨ ᠪᠤᠷᠬᠠᠨ ᠤᠬᠠᠭᠠᠨ᠂ ᠳᠠᠷᠬᠠᠨ ᠡᠬᠦᠷᠭᠡ ᠶᠢ ᠳᠠᠨᠢᠭᠤᠯᠤᠭᠰᠠᠨ ᠶᠤᠮ᠃ ᠨᠢᠭᠡᠨ ᠦᠶ᠎ᠡ ᠶᠢᠨ ᠳᠤᠷᠤᠶᠢᠳᠠᠨ ᠪᠠᠭᠤᠷᠠᠭᠰᠠᠨ ᠦᠨᠳᠤᠰᠤᠳᠠᠨ ᠤ ᠬᠤᠴᠤᠷᠠᠩᠭᠤᠢ ᠪᠠᠯᠠᠷᠯᠢᠭ ᠠᠮᠢᠳᠤᠷᠠᠯ ᠪᠠ ᠨᠡᠶᠢᠭᠡᠮ ᠤᠨ ᠡᠷᠭᠡ ᠳᠡᠭᠰᠢ ᠪᠤᠰᠤ  ᠂ ᠡᠷᠡᠬᠦᠯ ᠰᠠᠷᠠᠭᠤᠯ ᠢ ᠰᠠᠨᠠᠭᠠᠰᠢᠷᠠᠨ ᠪᠢᠴᠢᠭᠰᠡᠨ ︽ᠮᠠᠨ ᠤ ᠮᠤᠩᠭᠤᠯ ᠤᠨ ᠬᠦᠴᠦᠷᠭᠡᠭ ᠳᠠᠭᠤᠨ︾᠂  ︽ᠮᠠᠨ ᠤ ᠮᠤᠩᠭᠤᠯ ᠤᠨ ᠮᠠᠨᠳᠤᠬᠤ ᠳᠠᠭᠤᠨ︾ ᠬᠤᠶᠠᠷ ᠵᠤᠬᠢᠶᠠᠯ ᠪᠤᠯ ᠪᠦᠬᠦ ᠮᠤᠩᠭᠤᠯ ᠵᠠᠯᠠᠭᠤᠴᠤᠳ ᠤᠨ ᠰᠤᠷᠬᠤ ᠨᠤᠮ ᠪᠠᠶᠢᠭᠰᠠᠨ ᠶᠤᠮ᠃ ᠵᠢᠱᠢᠶᠡᠯᠡᠪᠡᠯ ︽ᠤᠷᠤᠭᠰᠢᠯᠠᠬᠤ ᠪᠢᠳᠠᠨ ᠤ ᠤᠭᠤᠷ ᠤᠨ ᠳᠠᠭᠤᠨ︾ ᠰᠢᠯᠦᠭ ᠪᠤᠯ ᠰᠤᠷᠤᠭᠴᠢᠳ ᠤᠨ ᠤᠷᠤᠰᠤᠮ᠎ᠠ ᠢᠷᠠᠭᠤ ᠤᠩᠰᠢᠯᠭ᠎ᠠ ᠶᠢᠨ ᠬᠢᠴᠢᠶᠡᠯ ᠪᠠᠶᠢᠭᠰᠠᠨ᠃ ᠡᠨᠡᠬᠦ ᠵᠤᠬᠢᠶᠠᠯ ᠤᠨ ᠶᠡᠭᠡᠩᠬᠢ ᠨᠢ ᠭᠡᠭᠡᠭᠳᠡᠭᠰᠡᠨ ᠪᠤᠯᠪᠠᠴᠤ ᠰᠠᠶᠢᠡᠭᠡᠷᠡᠯ᠂ ᠳᠤᠩᠭᠠᠯᠠᠭᠳᠠᠯᠠᠢ ᠨᠠᠷ ᠤᠨ ᠬᠠᠳᠠᠭᠠᠯᠠᠵᠦ ᠪᠠᠶᠢᠭᠰᠠᠨ ᠳᠠᠯᠠ ᠭᠠᠷᠤᠢ ᠪᠠᠳᠠᠭ ᠰᠢᠯᠦᠭ ᠨᠢ ᠪᠦᠷᠢᠨ ᠵᠤᠬᠢᠶᠠᠯ ᠤᠨ ᠨᠢᠭᠡ ᠳᠤᠯᠭᠠᠭᠤᠷᠢ ᠨᠢ ᠪᠤᠯᠤᠭᠰᠠᠨ ᠶᠤᠮ᠃ ᠭᠡᠪᠡᠴᠦ ᠤᠳᠤ ︽ᠮᠠᠨ ᠤ ᠮᠤᠩᠭᠤᠯ ᠤᠨ ᠬᠦᠴᠦᠷᠭᠡᠭ ᠳᠠᠭᠤᠨ︾ ᠤ ᠮᠤᠩᠭᠤᠯ ᠭᠡᠳᠡᠭ ᠢ ᠨᠢ ᠬᠠᠰᠤᠭᠠᠳ ᠤᠤᠯ ᠵᠤᠬᠢᠶᠠᠯ ᠳᠤ ᠪᠠᠶᠢᠭ᠎ᠠ ᠦᠭᠡᠢ ︽ᠳᠦᠪ ᠵᠠᠰᠠᠭ ᠤᠨ ᠤᠷᠳᠤᠨ ᠤ ᠤᠨᠴᠠ ᠶᠢᠨ ᠳᠦᠯᠦᠭᠡᠯᠡᠭᠴᠢ ᠁︾᠂ ︽ᠳᠤᠮᠳᠠᠳᠤ ᠤᠯᠤᠰ ᠤᠨ ᠪᠠᠭᠠᠳᠤᠷᠯᠢᠭ ᠠᠷᠠᠳ ᠤᠨ ᠬᠦᠴᠦᠷᠭᠡᠭ ᠳᠠᠭᠤᠨ᠂ ᠡᠭᠡ ᠤᠷᠤᠨᠴᠢ ᠳᠠᠩᠭᠠᠷᠢᠭ︾ ᠭᠡᠰᠡᠨ ᠪᠤᠶᠤ ︽ᠬᠠᠭᠤᠷᠮᠠᠭ ᠤᠨ ᠵᠠᠰᠠᠭ ᠤᠨ ᠤᠷᠳᠤᠨ᠂ ᠮᠤᠩᠭᠤᠯ ᠤᠨ ᠵᠠᠯᠢᠬᠠᠢ ᠳ᠋ᠧ ᠸᠠᠩ︾ ᠭᠡᠬᠦ ᠮᠡᠳᠦ ᠨᠡᠮᠡᠵᠦ ᠬᠠᠰᠤᠵᠦ ᠦᠭᠡᠷᠡᠴᠢᠯᠡᠭᠰᠡᠨ ᠨᠢ ᠢᠯᠡᠷᠭᠡᠢ ᠬᠠᠷᠠᠭᠳᠠᠨ᠎ᠠ᠃ ᠳᠠᠷᠠᠴᠢᠯᠠᠨ ︽ᠬᠦᠴᠦᠷᠭᠡᠭ ᠳᠠᠭᠤᠨ︾ ᠶᠢ ᠳᠠᠪᠢᠨ ᠤᠨ  ᠳᠤ ᠪᠢᠴᠢᠭᠰᠡᠨ ᠭᠡᠳᠡᠭ ᠢ ᠦᠵᠡᠬᠦ ᠳᠤ ᠬᠠᠭᠤᠴᠢᠨ ᠵᠤᠬᠢᠶᠠᠯ ᠨᠢ ᠪᠦᠷᠢᠨ ᠤᠯᠳᠠᠭ᠎ᠠ ᠦᠭᠡᠢ ᠨᠢ ᠮᠡᠳᠡᠭᠡᠵᠢ᠃ ᠭᠡᠪᠡᠴᠦ᠂ ᠠᠷᠭ᠎ᠠ ᠦᠭᠡᠢ ᠨᠢᠭᠡ ᠦᠶ᠎ᠡ ᠶᠢᠨ ᠬᠡᠷᠡᠯ ᠰᠠᠴᠤᠷᠠᠩᠭᠤᠢ ᠵᠤᠬᠢᠶᠠᠯ ᠳᠤ ᠵᠠᠰᠠᠪᠤᠷᠢ ᠤᠷᠤᠭᠤᠯᠤᠭᠰᠠᠨ ᠨᠢ ᠭᠡᠨᠡᠳᠳᠠ ᠶᠢᠨ ᠵᠠᠬᠦᠨ ᠤ ᠰᠠᠯᠬᠢᠨ ᠳᠤ ᠴᠤᠬᠢᠭᠳᠠᠭᠰᠠᠨ ᠠᠴᠠ ᠮᠤᠩᠭᠤᠯ ᠤᠯᠤᠰ ᠲᠤ ᠰᠤᠷᠤᠯᠴᠠᠵᠦ ᠪᠠᠶᠢᠬᠤ ᠳᠠᠭᠠᠨ ᠵᠠᠷᠢᠮ ᠵᠤᠬᠢᠶᠠᠯ ᠳᠤ ᠵᠠᠰᠠᠪᠤᠷᠢ ᠤᠷᠤᠭᠤᠯᠤᠭᠰᠠᠨ ᠨᠢ ᠮᠡᠳᠡᠭᠡᠵᠢ᠃ ᠵᠢᠱᠢᠶᠡᠯᠡᠬᠦ ᠳᠤ ︽ᠬᠠᠶᠢᠷᠠᠳᠠᠢ ᠦᠯᠦᠭᠡᠢ ᠨᠤᠳᠤᠭ ᠢᠶᠠᠨ ᠬᠠᠷᠬᠢᠰ ᠭᠤᠮᠢᠨᠳᠠᠩ ᠪᠠᠷ ᠬᠢᠰᠬᠢᠬᠦᠯᠬᠦ ᠦᠭᠡᠢ᠂ ᠡᠪᠦᠭᠡ ᠡᠪᠤᠭᠡᠳ ᠤᠨ ᠮᠢᠨᠢ ᠨᠤᠳᠤᠭ ᠰᠢᠦ᠂ ᠡᠪ ᠬᠠᠮᠳᠤ ᠨᠠᠮ ᠤᠨ ᠵᠠᠮ ᠢᠶᠠᠷ ᠡᠷᠭᠡ ᠴᠢᠯᠦᠭᠡ ᠪᠠᠨ ᠮᠠᠨᠳᠤᠭᠤᠯᠤᠶ᠎ᠠ︾ ᠭᠡᠮᠡᠨ ᠢᠯᠡᠷᠭᠡᠢ ᠵᠠᠰᠠᠭᠰᠠᠨ ᠪᠠᠶᠢᠳᠠᠭ᠃        ᠡᠶᠢᠨᠬᠦ ᠵᠠᠷᠢᠮ ᠡᠷᠳᠡᠮᠳᠠᠨ ᠰᠤᠳᠤᠯᠤᠭᠠᠴᠢᠳ ︽ᠨᠠ᠊᠂ ᠰᠠᠶᠢᠨᠴᠤᠭᠳᠤ ᠶᠢᠨ ᠪᠦᠷᠢᠨ ᠵᠤᠬᠢᠶᠠᠯ ᠦᠨᠡᠭᠡᠷ ᠪᠦᠷᠢᠨ ᠤᠤ︖︾ ᠭᠡᠵᠦ ᠳᠡᠦᠭᠡᠨ ᠮᠠᠲ᠋ᠧᠷᠢᠶᠠᠯ ᠤᠨ ᠤᠬᠤᠷ ᠴᠢᠨᠠᠷ ᠲᠤ ᠰᠠᠨᠠᠭᠠᠰᠢᠷᠠᠭᠰᠠᠨ ᠶᠢ ᠨᠢ ᠪᠢ ᠠᠩᠬᠠᠷᠤᠯ  ᠳᠠᠭᠠᠨ ᠠᠪᠴᠦ ᠡᠨᠡ ᠪᠦᠬᠦᠨ ᠢ ᠶᠠᠷᠢᠵᠦ ᠪᠠᠶᠢᠭ᠎ᠠ ᠪᠢᠯᠠ᠃ ᠶᠠᠭ ᠦᠨᠡᠨ ᠦᠭᠡ ᠬᠡᠯᠡᠪᠡᠯ᠂ ᠡᠷᠳᠡᠨ ᠤ ᠪᠢᠴᠢᠭᠰᠡᠨ ᠵᠤᠬᠢᠶᠠᠯ ᠨᠢ ᠦᠨᠡᠭᠡᠷ ᠪᠦᠷᠢᠨ ᠪᠤᠰᠤ ᠶᠤᠮ᠃ ᠮᠤᠩᠭᠤᠯ ᠤᠯᠤᠰ ᠪᠤᠶᠤ ᠤᠯᠤᠰ ᠴᠢᠯᠦᠭᠡᠯᠡᠭᠳᠡᠭᠰᠡᠨ ᠤ ᠬᠤᠶᠢᠨ᠎ᠠ ᠪᠢᠴᠢᠭᠰᠡᠨ ᠵᠤᠬᠢᠶᠠᠯ ᠨᠢ ᠰᠤᠶᠤᠯ ᠤᠨ ᠬᠤᠪᠢᠰᠬᠠᠯ ᠤᠨ ᠭᠠᠮᠰᠢᠭ ᠲᠤ ᠦᠷᠡᠭᠳᠡᠭᠰᠡᠨ ᠢ ᠭᠠᠷᠭᠠᠪᠠᠯ ᠪᠦᠷᠢᠨ ᠯᠠ ᠪᠠᠶᠢᠬ᠎ᠠ᠃        ᠡᠬᠦᠨ ᠢ ᠶᠠᠷᠢᠬᠤ ᠦᠭᠡᠢ᠂ ᠰᠢᠨ᠎ᠡ ᠬᠠᠭᠤᠴᠢᠨ ᠠᠯᠢ ᠴᠦ ᠦᠶ᠎ᠡ ᠶᠢᠨ ᠪᠤᠯᠤᠭ᠂ ᠠᠷᠪᠠᠨ ᠵᠢᠯ ᠤᠨ ᠰᠠᠮᠠᠭᠤᠷᠠᠯ ᠤᠨ ᠳᠤᠮᠳᠠ ᠦᠷᠡᠭᠳᠡᠵᠦ ᠭᠡᠭᠡᠭᠳᠡᠵᠦ ᠤᠯᠳᠠᠬᠤ ᠪᠤᠯᠤᠮᠵᠢ ᠦᠭᠡᠢ ᠪᠤᠯᠤᠭᠰᠠᠨ ᠨᠢᠭᠡᠨ ᠵᠠᠭᠤᠨ ᠤ ᠳᠡᠦᠭᠡᠨ ᠨᠤᠮ ᠵᠤᠬᠢᠶᠠᠯ ᠢ ᠮᠦᠷᠳᠡᠨ ᠰᠤᠷᠪᠤᠯᠵᠢᠯᠠᠵᠦ ᠡᠷᠢᠨ ᠴᠤᠭᠯᠠᠭᠤᠯᠵᠦ ᠳᠢᠭᠯᠡᠨ ᠨᠠᠶᠢᠷᠠᠭᠤᠯᠵᠦ᠂ ᠪᠦᠷᠢᠨ ᠵᠤᠬᠢᠶᠠᠯ ᠬᠡᠪᠯᠡᠬᠦᠯᠵᠦ ᠮᠤᠩᠭᠤᠯᠴᠤᠳ ᠤᠨ ᠬᠠᠯᠠᠭᠤᠨ ᠠᠯᠠᠭᠠᠨ ᠳᠤ ᠳᠠᠯᠪᠢᠭᠳᠠᠭᠰᠠᠨ ᠡᠨᠡᠬᠦ ᠰᠤᠶᠤᠯ ᠤᠨ ᠦᠪ ᠪᠤᠯ ᠳᠠᠷᠤᠢ ᠳᠡᠦᠭᠡᠨ ᠦᠨᠡᠨ ᠤ ᠤᠯᠠ ᠮᠦᠷ ᠢ ᠳᠤᠷᠠᠶᠢᠯᠭᠠᠭᠰᠠᠨ᠂ ᠰᠢᠨ᠎ᠡ ᠮᠢᠩᠭᠠᠨ ᠤ ᠰᠤᠶᠤᠯ ᠤᠨ ᠵᠢᠳᠬᠦᠯᠳᠠᠳ᠂ ᠡᠷᠳᠡᠮᠳᠠᠨ ᠵᠤᠬᠢᠶᠠᠯᠴᠢᠳ ᠠᠰᠠᠷᠤ ᠶᠡᠭᠡ ᠵᠢᠳᠬᠦᠯ᠂ ᠤᠶᠤᠨ ᠤ ᠬᠦᠴᠦ ᠬᠦᠳᠠᠯᠮᠤᠷᠢ ᠤᠷᠤᠭᠤᠯᠤᠭᠰᠠᠨ ᠢ ᠮᠠᠷᠳᠠᠵᠦ  ᠪᠤᠯᠤᠰᠢ ᠦᠭᠡᠢ ᠮᠦᠩᠭᠡ ᠳᠤᠷᠠᠰᠤᠭᠳᠠᠬᠤ ᠭᠠᠪᠢᠶ᠎ᠠ ᠶᠤᠮ᠃ ᠳᠠᠷᠠᠴᠢᠯᠠᠨ ᠨᠢᠭᠡᠨ ᠦᠶ᠎ᠡ ᠶᠢᠨ ᠠᠵᠠ ᠲᠠᠢ᠂ ᠰᠦᠨᠢᠳ ᠦᠬᠢᠳ᠂ ᠦᠨᠦᠳᠤᠷ ᠤᠨ ᠰᠠᠮᠠᠭᠠᠨ ᠪᠤᠭᠤᠷᠤᠯ ᠱᠠᠪᠢ ᠨᠠᠷ ᠴᠢᠨᠢ ᠳᠡᠦᠭᠡᠨ ᠤᠨ ᠵᠢᠯ ᠢ ᠳᠤᠷᠠᠰᠴᠦ᠂ ᠳᠡᠦᠭᠡᠨ ᠨᠤᠮ ᠵᠤᠬᠢᠶᠠᠯ ᠤᠨ ᠳᠤᠳᠠᠭᠤ ᠭᠡᠰᠡᠭ ᠢ ᠡᠷᠢᠨ ᠴᠤᠭᠯᠠᠭᠤᠯᠵᠦ ᠡᠷᠬᠢᠴᠡᠬᠦᠯᠦᠨ ᠳᠤᠷᠠᠳᠴᠦ᠂ ᠪᠦᠷᠢᠨ ᠵᠤᠬᠢᠶᠠᠯ ᠳᠤ ᠴᠦᠭᠡᠨ ᠪᠤᠰᠤ ᠦᠨᠡᠨ ᠮᠠᠲ᠋ᠧᠷᠢᠶᠠᠯ ᠬᠠᠩᠭᠠᠭᠰᠠᠨ ᠢ ᠤᠴᠢᠷᠯᠠᠨ ᠭᠡᠯᠡᠬᠦ ᠤᠴᠢᠷᠳᠠᠢ᠃        ᠦᠨᠡᠭᠡᠷ ᠨᠢᠭᠡᠨ ᠦᠶ᠎ᠡ ᠶᠢᠨ ᠠᠴᠢᠳᠠᠨ ᠮᠢᠨᠦ ᠪᠠᠭᠰᠢ ᠰᠠᠶᠢᠴᠤᠩᠭ᠎ᠠ ᠤᠳᠤ ᠦᠶ᠎ᠡ ᠶᠢᠨ ᠤᠳᠬ᠎ᠠ ᠵᠤᠬᠢᠶᠠᠯ  ᠪᠠᠷ ᠢᠶᠠᠨ ᠦᠨᠳᠤᠰᠤᠳᠠᠨ ᠢᠶᠠᠨ ᠰᠡᠭᠡᠭᠡᠷᠡᠬᠦᠯᠦᠨ ᠭᠡᠭᠡᠷᠡᠬᠦᠯᠵᠦ᠂ ᠦᠨᠦᠳᠤᠷ ᠤᠨ ᠳᠡᠦᠭᠡ ᠶᠢ ᠡᠬᠦᠳᠴᠦ᠂ ᠪᠠᠶ᠎ᠠ ᠪᠠᠨ ᠤᠷᠤᠰᠬᠠᠭᠰᠠᠨ ᠨᠢᠭᠡ ᠰᠢᠷᠭᠡᠭ ᠯᠠ ᠭᠡᠵᠦ ᠪᠢ ᠪᠤᠳᠤᠳᠠᠭ᠃ ︽ᠮᠠᠨ ᠤ ᠮᠤᠩᠭᠤᠯ ᠤᠨ ᠮᠠᠨᠳᠤᠬᠤ ᠳᠠᠭᠤᠨ︾ ᠴᠦ ᠠᠳᠠᠯᠢ᠂ ᠦᠨᠳᠤᠰᠤᠳᠠᠨ ᠤ ᠪᠦᠬᠦᠶᠢᠯᠡ ᠢᠷᠡᠭᠡᠳᠦᠢ ᠶᠢᠨ ᠮᠠᠨᠳᠤᠵᠦ ᠮᠦᠬᠦᠬᠦ ᠬᠤᠪᠢ ᠵᠠᠶᠠᠭ᠎ᠠ ᠶᠢ ᠬᠤᠯᠪᠤᠨ ᠰᠡᠳᠬᠢᠵᠦ᠂ ᠦᠨᠳᠤᠰᠤᠳᠠᠨ ᠤ ᠳᠤᠷᠤᠮᠵᠢᠯᠠᠯ ᠢ ᠵᠠᠨᠤᠨ ᠵᠢᠭᠰᠢᠵᠦ᠂ ᠪᠢᠷ ᠤᠨ ᠦᠵᠦᠬᠦᠷ ᠬᠤᠷᠴᠠᠯᠠᠨ ︽ᠵᠠᠨᠤᠯᠳᠤ ᠳᠠᠶᠢᠰᠤᠨ︾᠂ ︽ᠵᠠᠨᠤᠯᠳᠤ ᠬᠢᠯᠢᠩ︾ ᠬᠤᠶᠠᠷ ᠰᠢᠯᠦᠭ ᠢᠶᠠᠷ ᠢᠶᠠᠨ ᠨᠡᠶᠢᠭᠡᠮ ᠢ ᠢᠯᠡᠴᠢᠯᠡᠨ ᠨᠢᠴᠤᠭᠠᠵᠦ ᠪᠠᠶᠢᠭᠰᠠᠨ  ᠨᠢ ᠡᠷᠡᠯᠭᠡᠭ ᠵᠤᠷᠢᠭ ᠬᠦᠴᠦᠷᠭᠡᠭ ᠳᠠᠭᠤᠨ ᠶᠤᠮ᠃ ᠳᠡᠪᠬᠡᠷᠡᠨ ᠪᠤᠰᠤᠭᠰᠠᠨ ᠮᠤᠩᠭᠤᠯ ᠵᠠᠯᠠᠭᠤᠰ ᠳᠠᠪᠰᠢᠯᠳᠤ ᠤᠯᠠᠨ  ᠢ ᠠᠩᠬᠠᠷᠤᠨ ᠦᠵᠡᠭᠡᠷᠡᠢ︾ ᠭᠡᠮᠡᠨ ᠦᠬᠦᠰᠢᠷᠠᠨ ᠤᠨᠳᠠᠭᠰᠠᠨ ᠮᠤᠩᠭᠤᠯᠴᠤᠳ ᠢ ᠵᠠᠬᠦᠳᠤᠨ ᠠᠴᠠ ᠨᠢ ᠰᠡᠷᠡᠭᠡᠵᠦ᠂ ︽ᠦᠨᠳᠤᠰᠤᠳᠠᠨ ᠤ ᠳᠤᠷᠤᠮᠵᠢᠯᠠᠯ ᠢᠴᠢᠬᠦᠷᠢ ᠶᠢ ᠬᠡᠷᠭᠢᠨ ᠠᠷᠢᠯᠭᠠᠵᠦ ᠴᠢᠳᠠᠬᠤ ᠪᠤᠢ︾᠂ ︽ᠳᠡᠭᠡᠳᠦᠰ ᠤᠨ ᠰᠦᠷ  ᠢᠶᠠᠨ ᠳᠠᠬᠢᠨ ᠮᠠᠨᠳᠤᠭᠤᠯᠤᠶ᠎ᠠ᠃ ᠤᠳᠤ ᠬᠤᠷᠳᠤᠨ ᠪᠠᠭᠠᠳᠤᠷᠯᠠᠨ ᠪᠤᠰᠴᠠᠭᠠᠶ᠎ᠠ︾᠂ ︽ᠬᠠᠭᠤᠴᠢᠨ ᠶᠠᠭᠤᠮ᠎ᠠ ᠰᠦᠨᠦᠵᠦ᠂ ᠰᠢᠨ᠎ᠡ ᠬᠦᠴᠦᠨ ᠦᠰᠤᠨ ᠳᠡᠯᠭᠡᠷᠡᠬᠦ︾ ᠦᠨᠡᠨ ᠶᠤᠰᠤ ᠶᠢ ᠦᠬᠦᠯᠡᠵᠦ᠂ ᠪᠠᠯᠠᠷᠯᠢᠭ ᠨᠠᠶᠢᠭᠡᠮ ᠢ ᠵᠢᠭᠰᠢᠵᠦ ︽ᠡᠵᠢ ᠶᠢᠨ ᠮᠢᠨᠢ ᠬᠦᠮᠦᠵᠢᠬᠦᠯᠦᠭᠰᠡᠨ ᠡᠷᠬᠢᠮ ᠪᠠᠶ᠎ᠠ ᠶᠢ ᠡᠪᠡᠳᠴᠢᠨ ᠲᠠᠢ ᠪᠤᠯᠭᠠᠬᠤ ᠰᠠᠮᠠᠭᠤᠨ ᠤ ᠬᠤᠤᠷ᠂ ᠤᠯᠤᠰ ᠤᠭᠰᠠᠭ᠎ᠠ ᠶᠢᠨ ᠤᠯᠠᠮᠵᠢᠯᠠᠬᠤ ᠴᠢᠰᠤ ᠶᠢ ᠤᠯᠪᠠᠷᠭᠠᠨ ᠬᠡᠮᠳᠡᠭᠡᠬᠦ ᠰᠠᠮᠠᠭᠤᠨ ᠤ ᠬᠤᠤᠷ︾ ᠢ ᠢᠯᠡᠴᠢᠯᠠᠵᠦ᠂ ᠡᠷᠬᠢᠮ ᠳᠡᠭᠡᠳᠦ ᠡᠷᠡᠬᠦᠯ ᠰᠠᠷᠠᠭᠤᠯ ᠤᠬᠠᠭᠠᠯᠢᠭ ᠦᠰᠤᠨ ᠪᠤᠶᠢᠵᠢᠬᠤ ᠶᠢ ᠤᠬᠠᠭᠠᠷᠠᠭᠤᠯᠵᠦ  ᠂ ᠡᠷᠳᠡ ᠪᠢᠴᠢᠭᠰᠡᠨ ᠵᠤᠬᠢᠶᠠᠯ ᠤᠨ ᠨᠢᠭᠡ ᠶᠤᠮ᠃        ︽ᠡᠯᠡᠰᠤ ᠮᠠᠩᠬᠠᠨ ᠤ ᠡᠭᠡ ᠨᠤᠳᠤᠭ︾ ᠤᠨ ᠳᠡᠮᠳᠡᠭᠯᠡᠯ ᠢ ᠭᠡᠳᠤᠨ ᠡᠳᠦᠷ᠂ ᠭᠡᠳᠦᠨ ᠰᠠᠷ᠎ᠠ ᠯᠠ ᠪᠢᠴᠢᠭᠰᠡᠨ ᠪᠢᠰᠢ᠂ ᠵᠦᠪᠭᠡᠨ ᠳᠦᠴᠢᠨ ᠤᠨ ᠤ ᠨᠢᠭᠡᠯᠡ ᠵᠢᠯ ᠤᠨ ᠳᠡᠮᠳᠡᠭᠯᠡᠯ ᠴᠦ ᠪᠢᠰᠢ ᠶᠤᠮ᠃ ᠶᠡᠭᠡᠩᠬᠢ ᠶᠢ ᠨᠢ ᠭᠤᠴᠢᠭᠠᠳ ᠤᠨ ᠤ ᠰᠡᠬᠦᠯᠴᠢ᠂ ᠳᠦᠴᠢᠭᠡᠳ ᠤᠨ ᠤ ᠡᠬᠢ ᠪᠠᠷ ᠬᠠᠷᠢ ᠬᠦᠷᠦᠨ᠂ ᠪᠤᠯᠪᠠᠰᠤᠨ ᠤᠯᠤᠰ ᠤᠨ ᠬᠦᠭᠵᠢᠭᠰᠡᠨ ᠰᠤᠶᠤᠯ ᠢ ᠰᠤᠷᠴᠦ ᠰᠤᠳᠤᠯᠵᠦ᠂ ᠦᠵᠡᠵᠦ ᠪᠠᠭ᠋ᠠᠷᠬᠠᠵᠦ ᠶᠠᠪᠤᠭᠰᠠᠨ ᠤᠨ ᠵᠢᠯ ᠤᠳ ᠲᠤ ᠡᠭᠡ ᠨᠤᠳᠤᠭ ᠢᠶᠠᠨ ᠰᠠᠨᠠᠨ ᠮᠦᠷᠦᠭᠡᠳᠴᠦ᠂ ᠡᠳᠦᠷ ᠤᠨ ᠳᠡᠮᠳᠡᠭᠯᠡᠯ ᠤᠨ ᠬᠡᠯᠪᠡᠷᠢ ᠪᠠᠷ ᠪᠢᠴᠢᠭᠰᠡᠨ ᠵᠤᠬᠢᠶᠠᠯ ᠪᠦᠭᠡᠳ ᠵᠤᠨ  ᠤ ᠠᠮᠠᠷᠠᠯᠳᠠ ᠪᠠᠷ ᠨᠤᠳᠤᠭ ᠲᠠᠭᠠᠨ ᠢᠷᠡᠭᠡᠳ ᠶᠠᠭᠤ ᠨᠢᠭᠡ ᠶᠢ ᠰᠠᠨᠠᠭᠠᠰᠢᠷᠠᠨ ︽ᠳᠡᠷᠭᠡᠨ ᠪᠧᠯᠧᠲ ᠬᠦᠯᠢᠶᠡᠭᠰᠡᠨ︾᠂ ︽ᠡᠯᠡᠰᠤ ᠮᠠᠩᠬᠠᠨ ᠤ ᠡᠭᠡ ᠨᠤᠳᠤᠭ ᠤᠨ ᠨᠢᠭᠡᠨ ᠠᠶᠢᠯ︾᠂ ︽ᠳᠤᠶᠤᠩ ᠰᠦᠮ᠎ᠡ ᠶᠢᠨ ᠬᠤᠷᠠᠯ︾᠂ ︽ᠰᠠᠭᠠᠯᠢ  ᠶᠢᠨ ᠦᠨᠤᠷ ᠲᠠᠢ ᠪᠦᠰᠡᠬᠦᠢ︾ ᠭᠡᠬᠦᠴᠢᠯᠠᠨ ᠰᠠᠭᠦᠳᠠᠷ ᠲᠠᠢ ᠨᠡᠶᠢᠭᠡᠮ ᠤᠨ ᠡᠮᠵᠡᠭ ᠲᠠᠢ ᠵᠦᠢᠯ ᠢ ᠠᠵᠢᠭᠯᠠᠨ ᠳᠡᠮᠳᠡᠭᠯᠡᠬᠦ ᠶᠢᠨ ᠳᠠᠭᠠᠤ ︽ᠠᠯᠳᠠᠨ ᠰᠢᠷᠭᠠᠯ ᠡᠯᠡᠰᠤ ᠮᠢᠨᠢ᠂ ᠠᠰᠢᠳᠠ ᠶᠢᠨ ᠵᠠᠶᠠᠭᠠᠭᠰᠠᠨ ᠤᠷᠤᠨ᠂ ᠮᠢᠨᠦ ᠳᠦᠷᠦᠭᠰᠡᠨ ᠨᠤᠳᠤᠭ︾᠂ ︽ᠰᠠᠬᠦᠶᠢᠨ ᠰᠦᠨᠳᠡᠷᠯᠡᠭᠰᠡᠨ ᠹᠦᠵᠢ ᠠᠭᠤᠯᠠ ᠰᠦᠷᠯᠢᠬᠦᠨ ᠰᠠᠶᠢᠬᠠᠨ᠂ ᠰᠡᠳᠬᠢᠯ ᠬᠦᠳᠡᠯᠭᠡᠮ᠎ᠡ ᠰᠤᠶᠤᠯ ᠤᠨ ᠬᠦᠢᠰᠤ ᠳᠤᠤᠺᠢᠤ᠋ ᠬᠤᠳᠠ ᠬᠦᠭᠵᠢᠶᠠᠨ ᠲᠠᠢ︾ ᠬᠡᠮᠡᠨ ᠬᠠᠷᠢ ᠭᠠᠳᠠᠭᠠᠳᠤ ᠳᠤ ᠪᠢᠴᠢᠭᠰᠡᠨ ᠵᠤᠬᠢᠶᠠᠯ ᠢᠶᠠᠨ ᠬᠠᠷᠢᠴᠠᠭᠤᠯᠤᠨ ᠤᠶᠠᠩᠭᠠᠯᠠᠵᠦ ᠦᠨᠳᠤᠰᠤᠳᠠᠨ ᠤ ᠪᠠᠭ᠋ᠠᠷᠬᠠᠯ ᠢ ᠳᠠᠳᠠᠳᠠᠭ᠃ ︽ᠰᠡᠳᠬᠢᠯ ᠤᠨ ᠬᠦᠩᠰᠢᠷᠠᠯ︾  ︽ᠠᠶᠢᠯ ᠢᠶᠠᠨ ᠦᠭᠡᠳᠡᠯᠡᠬᠦᠯᠬᠦ  ︾ ᠬᠤᠶᠠᠷ ᠵᠤᠬᠢᠶᠠᠯ ᠢ ᠪᠤᠯ ᠦᠬᠢᠳ ᠤᠨ ᠰᠤᠷᠭᠠᠭᠤᠯᠢ ᠳᠤ ᠪᠠᠭᠰᠢᠯᠠᠵᠦ ᠪᠠᠶᠢᠬᠤ ᠳᠠᠭᠠᠨ ᠨᠦᠬᠦᠳ ᠤᠨ ᠬᠠᠶᠢᠷ᠎ᠠ ᠰᠠᠳᠬᠢᠯ᠂ ᠪᠠᠭᠰᠢ  ᠱᠠᠪᠢ ᠶᠢᠨ ᠬᠠᠯᠠᠮᠵᠢ ᠬᠦᠨᠳᠤᠳᠭᠡᠯ ᠢᠶᠠᠷ ᠭᠤᠤᠯᠯᠠᠭᠰᠠᠨ ︽ᠬᠦᠴᠦᠯᠡᠬᠦᠨ ᠤᠷᠬᠢᠯᠬᠤ ᠬᠦᠨ ᠵᠢᠷᠦᠭᠡᠨ ᠤ ᠬᠠᠶᠢᠷ᠎ᠠ᠂ ᠰᠡᠭᠡᠭᠡᠷᠡᠨ ᠤᠬᠠᠭᠠᠷᠠᠬᠤ ᠰᠠᠯᠠᠬᠦᠨ ᠳᠤᠭᠳᠠᠭᠤᠨ ᠪᠤᠳᠤᠯᠭ᠎ᠠ᠂ ᠬᠦᠭᠡᠷᠦᠬᠦᠨ ᠢᠨᠢᠶᠡᠬᠦ ᠬᠦᠩᠭᠡᠮᠰᠦᠭ ᠡᠶᠡᠯᠳᠡᠭ ᠠᠭᠠᠯᠢ᠂ ᠬᠦᠮᠦᠨ ᠤ ᠰᠡᠳᠬᠢᠯ ᠢ ᠪᠠᠶᠠᠰᠬᠠᠨ ᠳᠤᠩᠭᠠᠭᠰᠢᠯᠠᠭᠤᠯᠤᠨ᠎ᠠ︾ ᠵᠢᠴᠢ ︽ᠵᠠᠮᠪᠠ ᠳᠤᠷ ᠳᠠᠷᠤᠭᠳᠠᠭᠰᠠᠨ ᠨᠢᠯᠬ᠎ᠠ ᠨᠤᠭᠤᠭ᠎ᠠ︾᠂ ︽ᠨᠢᠳᠤ ᠦᠨᠡᠭᠡᠷ ᠭᠠᠶᠢᠬᠠᠮᠰᠢᠭ︾᠂ ︽ ᠮᠠᠨᠳᠤᠭᠠᠷᠠᠢ︾ ᠭᠡᠬᠦ ᠤᠬᠢ ᠰᠢᠯᠢᠳᠡᠭ ᠵᠤᠬᠢᠶᠠᠯ ᠨᠢ ᠰᠤᠷᠤᠭᠴᠢᠳ ᠤᠨ ᠤᠶᠤᠨ ᠶᠢ ᠨᠡᠭᠡᠭᠡᠭᠳᠡᠬᠦᠯᠵᠦ ᠵᠢᠷᠦᠭᠡ ᠵᠠᠬᠦᠳᠤᠨ ᠳᠤ ᠬᠤᠨᠤᠭᠰᠢᠭᠰᠠᠨ ᠬᠢᠴᠢᠶᠡᠯ ᠤᠨ ᠨᠢᠭᠡ ᠶᠤᠮ᠃ ᠪᠠᠭᠴᠠᠯᠠᠭᠠᠳ ᠬᠡᠯᠡᠪᠡᠯ ᠮᠢᠨᠦ ᠪᠠᠭᠰᠢ ᠰᠠᠶᠢᠴᠤᠩᠭ᠎ᠠ ᠬᠤᠷᠢᠳᠤᠭᠠᠷ ᠵᠠᠭᠤᠨ ᠤ ᠠᠭᠤᠤ ᠬᠤᠪᠢᠰᠬᠠᠯᠴᠢ ︽ᠪᠢᠯᠢᠭ ᠤᠨ ᠬᠤᠶᠠᠷ ᠴᠢᠬᠢᠨ ᠳᠤ ᠪᠡᠭᠡᠵᠢᠩ ᠤᠨ ᠳᠠᠭᠤᠨ ᠰᠠᠶᠢᠬᠠᠨ︾ ᠬᠡᠮᠡᠨ ᠨᠠᠮ ᠳᠦᠷᠦ ᠶᠢᠨ ᠳᠠᠭᠤᠨ ᠬᠤᠭᠤᠯᠠᠢ ᠶᠢ ᠨᠡᠪᠳᠡᠷᠡᠬᠦᠯᠦᠨ ᠳᠠᠶᠠᠩ ᠳᠠᠯᠠᠭᠡᠢ ᠳᠤ ᠮᠦᠩᠭᠡ ᠳᠤᠷᠠᠰᠬᠠᠭᠳᠠᠭᠰᠠᠨ ᠬᠦᠮᠦᠨ ᠶᠤᠮ᠃        ᠴᠠᠭ ᠳᠦᠷᠦ ᠳᠡᠭᠰᠢᠷᠡᠭᠰᠡᠨ ᠬᠦᠭᠡ ᠬᠤᠨᠢᠨ ᠵᠢᠯ ᠬᠦᠷᠴᠦ ᠢᠷᠡᠬᠦ ᠳᠤ᠂ ᠳᠠᠨ ᠤ ᠮᠠᠨᠳᠤᠯᠡᠭᠰᠡᠨ ᠵᠠᠭᠤᠨ ᠵᠢᠯ ᠤᠨ ᠤᠢ᠂ ᠳᠦᠪ ᠷᠠᠳᠢᠤ᠋ ︵ᠪᠡᠭᠡᠵᠢᠩ ᠤᠨ ᠮᠤᠩᠭᠤᠯ ᠳᠠᠭᠤᠨ︶ ᠶᠢᠨ ᠵᠢᠷᠠᠨ ᠳᠠᠪᠤᠨ ᠵᠢᠯ ᠤᠨ ᠪᠠᠶᠠᠷ ᠲᠠᠢ ᠵᠡᠷᠭᠡᠴᠡᠵᠦ᠂ ᠳᠦᠷᠦᠭᠰᠡᠨ ᠨᠤᠳᠤᠭ ᠰᠢᠯᠤᠭᠤᠨ ᠬᠦᠭᠡ ᠬᠤᠰᠢᠭᠤᠨ ᠤ ᠨᠠᠮ ᠵᠠᠰᠠᠭ᠂ ᠠᠷᠠᠳ ᠳᠦᠮᠡᠨ ᠤᠳᠬ᠎ᠠ ᠤᠷᠠᠯᠢᠭ ᠤᠨ ᠬᠤᠯᠪᠤᠭ᠎ᠠ ᠨᠢᠵᠡᠭᠡᠷ ᠶᠡᠭᠡ ᠳᠤᠷᠠᠰᠬᠠᠨ ᠪᠡᠯᠭᠡᠯᠡᠬᠦ ᠳᠤ ᠳᠦᠷᠪᠡᠨ ᠵᠦᠭ ᠨᠠᠢᠮᠠᠨ ᠵᠤᠪᠬᠢᠰ ᠤᠨ ᠮᠤᠩᠭᠤᠯᠴᠤᠳ ᠰᠤᠶᠤᠯ ᠤᠨ ᠵᠢᠳᠬᠦᠯᠳᠠᠨ ᠢᠷᠠᠭᠤ ᠨᠠᠶᠢᠷᠠᠭᠴᠢ᠂ ᠡᠷᠳᠡᠮᠳᠠᠨ ᠵᠤᠬᠢᠶᠠᠯᠴᠢᠳ᠂ ᠵᠤᠬᠢᠶᠠᠯ ᠪᠦᠳᠦᠭᠡᠯ ᠳᠤᠷᠠᠳᠬᠠᠯ ᠳᠤᠷᠠᠰᠤᠮᠵᠢ ᠪᠠᠷ ᠢᠶᠠᠨ ᠪᠡᠯᠭᠡᠯᠡᠨ᠂ ᠮᠤᠩᠭᠤᠯᠴᠤᠳ ᠤᠨ ᠬᠠᠯᠭᠠᠤᠨ ᠮᠡᠯᠮᠡᠢ ᠳᠤ ᠬᠦᠷᠭᠡᠵᠦ ᠰᠡᠳᠬᠢᠯ ᠴᠠᠯᠬᠢᠭᠤᠯᠤᠨᠠᠮ᠃        ᠡᠨᠡᠬᠦ ᠪᠠᠶᠠᠷᠳᠤ ᠴᠠᠭ ᠢ ᠬᠦᠯᠢᠶᠡᠭᠰᠡᠨ ᠪᠢ ᠡᠭᠡ ᠰᠤᠷᠭᠠᠭᠤᠯᠢ᠂ ᠡᠨᠡᠷᠢᠯᠳᠤ ᠪᠠᠭᠰᠢ ᠶᠢᠨ ᠢᠶᠠᠨ ᠳᠤᠷᠠᠰᠤᠮᠵᠢ ᠳᠡᠦᠭᠡ ᠶᠢ ᠡᠷᠬᠢᠴᠡᠬᠦᠯᠦᠭᠰᠡᠨ ᠬᠤᠶᠠᠷ ᠨᠤᠮ ᠢᠶᠠᠨ ᠮᠦᠩᠭᠡ ᠳᠤᠷᠠᠰᠤᠭᠳᠠᠬᠤ ᠳᠡᠦᠭᠡᠨ ᠳᠤ ᠨᠢ  ᠪᠡᠯᠡᠭᠯᠡᠬᠦ ᠶᠢ ᠰᠠᠨᠠᠭᠰᠠᠨ ᠶᠤᠮ᠃ ᠡᠶᠢᠨᠬᠦ  ︽ᠮᠢᠨᠦ ᠪᠠᠭᠰᠢ ᠰᠠᠶᠢᠴᠤᠩᠭ᠎ᠠ︾᠂ ︽ᠪᠡᠭᠡᠵᠢᠩ ᠤᠨ ᠳᠠᠭᠤᠨ ᠮᠤᠩᠭᠤᠯ ᠷᠠᠳᠢᠤ᠋ ᠪᠠᠨ ᠪᠠᠭ᠋ᠠᠷᠬᠠᠵᠦ ᠶᠠᠪᠤᠭᠰᠠᠨ ᠤᠨ ᠵᠢᠯ︾ ᠭᠡᠬᠦ ᠬᠤᠶᠠᠷ ᠤᠬᠤᠷ ᠵᠤᠬᠢᠶᠠᠯ ᠢᠶᠠᠨ ᠳᠤᠰ ᠳᠤᠰ ᠳᠠᠪᠰᠢᠬᠦᠯᠵᠦ᠂ ᠰᠢᠯᠤᠭᠤᠨ ᠬᠦᠭᠡ ᠬᠤᠰᠢᠭᠤᠨ ᠤ ᠤᠳᠬ᠎ᠠ ᠤᠷᠠᠯᠢᠭ ᠤᠨ ᠬᠢᠨ ᠤ ᠬᠤᠯᠪᠤᠭ᠎ᠠ ᠠᠴᠠ ᠠᠭᠤᠤ ᠬᠦᠮᠦᠨ ᠤ ᠬᠠᠭᠠᠰ ᠪᠠᠶ᠎ᠠ ᠶᠢᠨ ᠪᠤᠯᠤᠷ ᠰᠢᠯᠢᠨ ᠬᠦᠷᠦᠭ᠂ ᠳ᠋ᠧ ᠰᠧᠩ ᠳᠡᠮᠳᠡᠭᠳᠦ ᠷᠠᠳᠢᠤ᠋᠂ ᠵᠤᠬᠢᠶᠠᠯ ᠤᠨ ᠤᠨᠴᠠ ᠳᠡᠰ ᠤᠨ ᠱᠠᠩᠨᠠᠯ ᠳᠤᠰᠴᠦ  ᠪᠠᠶᠠᠷᠯᠠᠨ ᠰᠠᠭᠤᠨᠠᠮ᠃        ᠳᠦᠪ ᠷᠠᠳᠢᠤ᠋ ᠶᠢᠨ ᠤᠳᠤᠨ ᠰᠤᠳᠤᠨ ᠬᠦᠳᠦᠯᠦᠭᠴᠢᠳ ᠤᠨ ᠢᠷᠠᠭᠤ ᠠᠯᠳᠠᠷ ᠤᠨ ᠴᠤᠮᠤᠭ᠂ ᠳ᠋ᠧ  ᠰᠧᠩ ᠳᠡᠮᠳᠡᠭᠳᠦ ᠷᠠᠳᠢᠤ᠋᠂ ᠵᠤᠬᠢᠶᠠᠯ ᠤᠨ ᠭᠤᠷᠪᠠᠳᠤᠭᠠᠷ ᠳᠡᠰ ᠤᠨ ᠬᠦᠬᠢᠬᠦᠯᠦᠯ ᠭᠠᠷᠳᠠᠵᠦ᠂ ᠮᠤᠩᠭᠤᠯ ᠷᠠᠳᠢᠤ᠋ ᠪᠠᠨ ᠪᠠᠭ᠋ᠠᠷᠬᠠᠬᠤ ᠮᠢᠨᠦ ᠵᠢᠷᠭᠠᠯ ᠶᠤᠮ᠃        ᠦᠩᠭᠡᠷᠡᠭᠰᠡᠨ ᠳᠡᠦᠭᠡ ᠶᠢ ᠡᠳᠦᠭᠡ ᠡᠷᠬᠢᠴᠡᠬᠦᠯᠦᠨ ᠰᠠᠨᠠᠬᠤ ᠳᠤ ᠮᠤᠩᠭᠤᠯᠴᠤᠳ ᠮᠢᠨᠢ  ︽ᠤᠭᠤᠷ ᠤᠨ ᠳᠠᠭᠤᠨ  ︾ ᠢ ᠤᠩᠰᠢᠭ᠎ᠠ ᠦᠭᠡᠢ᠂ ᠵᠠᠨᠤᠯᠳᠤ ᠳᠠᠶᠢᠰᠤᠨ ᠳᠤ ᠬᠢᠯᠢᠩᠨᠠᠵᠦ ᠴᠦ ᠴᠢᠳᠠᠭ᠎ᠠ ᠦᠭᠡᠢ᠃ ᠵᠠᠨᠤᠯᠳᠤ ᠬᠢᠯᠢᠩ ᠢ ᠤᠶᠢᠯᠭᠠᠵᠦ ᠴᠦ ᠵᠠᠪᠳᠠᠭ᠎ᠠ ᠦᠭᠡᠢ᠃ ᠶᠠᠷᠤ ᠨᠢ ᠳᠡᠦᠭᠡ ᠶᠢ ᠳᠤᠯᠢᠳᠠᠵᠦ᠂ ᠰᠢᠯᠦᠭ ᠢ ᠨᠢ ᠤᠩᠰᠢᠭ᠎ᠠ ᠦᠭᠡᠢ᠃ ᠤᠶᠢᠷ᠎ᠠ ᠶᠢᠨ ᠦᠶ᠎ᠡ ᠶᠢᠨ  ︽ᠬᠦᠭᠡ ᠳᠤᠷᠭᠠᠨ ᠳᠡᠷᠯᠢᠭ︾ ᠢ ᠤᠶᠠᠩᠭᠠᠯᠠᠵᠦ ᠤᠩᠰᠢᠳᠠᠭ ᠪᠤᠯᠪᠠᠴᠦ ᠵᠠᠭᠤᠨ ᠰᠤᠨᠳᠠᠯᠠᠭᠰᠠᠨ ᠠᠶᠠᠨ ᠵᠠᠮ ᠤᠨ ᠭᠠᠶᠢᠬᠠᠮᠰᠢᠭᠳᠤ ᠤᠶᠠᠩᠭ᠎ᠠ ᠰᠢᠯᠦᠭ ᠢ ᠨᠢ ᠤᠶᠠᠩᠭᠠᠯᠠᠭᠰᠠᠨ ᠬᠦᠮᠦᠨ ᠳᠠᠩᠴᠦ ᠬᠤᠪᠤᠷ ᠶᠤᠮ᠃ ᠡᠶᠢᠨᠬᠦ ᠳᠤᠷᠠᠰᠬᠤ ᠦᠭᠡᠢ ᠪᠠᠶᠢᠬᠤ ᠶᠢᠨ ᠠᠷᠭ᠎ᠠ ᠦᠭᠡᠢ᠂ ᠡᠨᠡᠬᠦ ᠰᠢᠯᠦᠭ ᠤᠨ ᠳᠡᠦᠭᠡ ᠶᠢ ᠳᠤᠷᠠᠳᠪᠠᠯ᠂ ᠳᠡᠭᠡᠷ᠎ᠡ ᠵᠠᠭᠤᠨ ᠤ ᠳᠦᠴᠢᠭᠡᠳ ᠤᠨ ᠤ ᠡᠮᠦᠨ᠎ᠡ ᠰᠦᠨᠢᠳ ᠶᠠᠮᠤᠨ ᠤ ᠵᠢᠯᠤᠭᠤᠴᠢ᠂ ᡀᠠᠪᠵᠢᠨ ᠭᠤᠸᠠᠢ᠂ ᠴᠢᠴᠧ ᠫᠧᠷᠠᠩᠯᠢ ᠭᠤᠸᠠᠢ ᠨᠠᠷ ᠤᠨ ᠠᠴᠢᠶᠠᠨ ᠤ ᠮᠠᠰᠢᠨ ᠳᠤ ᠰᠢᠬᠠᠯᠳᠠᠨ ᠰᠠᠭᠤᠵᠦ᠂ ᠰᠠᠯᠬᠢ ᠰᠦᠷᠦᠭᠰᠡᠨ ᠠᠶᠠᠨ ᠵᠠᠮ ᠢ ᠳᠤᠷᠠᠰᠬᠤ ᠳᠤ ᠬᠠᠷᠢᠨ ᠳᠦᠴᠢᠨ ᠬᠤᠶᠠᠷ ᠤᠨ ᠳᠤ ᠮᠢᠨᠦ ᠪᠠᠭᠰᠢ ᠰᠠᠶᠢᠴᠤᠩᠭ᠎ᠠ ᠳᠦᠷᠪᠡᠨ ᠠᠩᠬᠢ ᠶᠢᠨ ᠵᠠᠭᠤ ᠭᠠᠷᠤᠢ ᠰᠤᠷᠤᠭᠴᠢ ᠶᠢ ᠳᠠᠭᠠᠭᠤᠯᠤᠨ ᠭᠡᠳᠦᠨ ᠠᠷᠪᠠᠨ ᠬᠠᠰᠠᠭ ᠳᠡᠷᠭᠡ ᠶᠢ ᠵᠦᠷᠬᠡᠯᠡᠬᠦᠯᠦᠨ ᠠᠷᠠᠯ ᠤᠨ ᠱᠠᠷ ᠤᠨ ᠠᠯᠬᠤᠭ᠎ᠠ ᠪᠠᠷ ᠭᠠᠯ ᠠᠶᠠᠨ ᠢ ᠬᠦᠳᠦᠯᠵᠦ᠂ ᠭᠠᠩ ᠪᠢᠷ ᠬᠢᠯᠠᠯᠵᠠᠭᠤᠯᠤᠨ ᠭᠠᠶᠢᠬᠠᠮ᠎ᠠ ᠰᠢᠯᠦᠭ ᠤᠶᠠᠩᠭ᠎ᠠ ᠪᠢᠯᠬᠠᠭᠤᠯᠤᠭᠰᠠᠭᠠᠷ᠃          ᠡᠨᠡ ᠨᠢᠭᠡᠨ ᠨᠠᠰᠤᠨ ᠳᠠᠭᠠᠨ ᠤᠴᠠᠷᠠᠬᠤ ᠢᠷᠦᠭᠡᠯ ᠲᠠᠢ          ᠡᠩ ᠤᠨ ᠳᠠᠨᠢᠬᠤ ᠦᠭᠡᠢ ᠨᠦᠬᠦᠳ ᠡ          ᠡᠭᠡᠭᠡᠨ ᠤᠴᠠᠷᠠᠭᠰᠠᠨ ᠡᠨᠡ ᠨᠢᠭᠡᠨ ᠴᠢᠯᠦᠭᠡᠨ᠎ᠡ          ᠡᠷᠬᠢᠮ ᠰᠠᠶᠢᠨ ᠢ ᠢᠯᠡᠳᠭᠡᠴᠡᠭᠡᠶ᠎ᠡ ᠭᠡᠮᠡᠨ ᠵᠤᠭᠠᠴᠠᠨ ᠠᠶᠠᠯᠠᠵᠦ ᠬᠡᠭᠡᠷ᠎ᠡ ᠳᠠᠯ᠎ᠠ ᠳᠤ ᠳᠤᠯᠭ᠎ᠠ ᠶᠢᠨ ᠭᠤᠷᠪᠠᠨ ᠴᠢᠯᠠᠭᠤ ᠪᠤᠰᠬᠠᠵᠦ ᠤᠮᠳᠠ ᠬᠤᠭᠤᠯᠠ ᠪᠠᠨ ᠪᠡᠯᠡᠳᠭᠡᠵᠦ ᠢᠳᠡᠭᠡᠳ ᠪᠤᠷᠬᠠᠨ ᠳᠠᠭᠠᠨ ᠮᠦᠷᠬᠦᠵᠦ᠂ ᠴᠠᠮ ᠦᠵᠡᠭᠡᠳ ᠢᠷᠡᠳᠡᠭ ᠳᠤᠷᠠᠰᠤᠮᠵᠢ ᠰᠠᠨᠠᠭᠳᠠᠯ᠎ᠠ᠃        ᠳᠠᠪᠤᠨ ᠰᠠᠷᠠᠶᠢᠨ ᠠᠷᠪᠠᠨ ᠭᠤᠷᠪᠠᠨ ᠤ ᠳᠠᠷᠬᠠᠨ ᠳᠠᠬᠢᠯᠭ᠎ᠠ ᠲᠠᠢ᠂ ᠪᠠᠶᠠᠨ ᠪᠤᠭᠳᠠ ᠤᠪᠤᠭᠠᠨ ᠳᠠᠭᠠᠨ ᠮᠦᠷᠬᠦᠵᠦ᠂ ᠳᠤᠯᠤᠭᠠᠨ ᠰᠠᠷ᠎ᠠ ᠶᠢᠨ ᠬᠤᠷᠢᠨ ᠳᠤᠯᠤᠭᠠᠨ᠎ᠠ ᠪᠤᠷᠵᠢᠬᠢᠨ ᠤᠳᠤᠮ ᠤᠨ ᠬᠠᠯᠠᠭᠤᠨ ᠶᠠᠰᠤᠳᠠᠨ ᠤ ᠤᠩᠭᠤᠨ — ᠠᠯᠳᠠᠨ ᠤᠪᠤᠭᠠᠨ ᠳᠠᠭᠠᠨ  ᠮᠦᠷᠬᠦᠨ ᠭᠡᠴᠢᠨᠡᠨ ᠤᠳᠠᠭ᠎ᠠ ᠠᠶᠠᠯᠠᠭᠰᠠᠨ ᠮᠢᠨᠢ ᠦᠴᠦᠭᠡᠳᠦᠷᠭᠡᠨ ᠰᠢᠭ ᠰᠠᠠᠨᠠᠭᠳᠠᠨᠠᠮ᠃        ᠮᠡᠷᠳᠡᠵᠦ ᠴᠢᠳᠠᠬᠤ ᠦᠭᠡᠢ ᠠᠶᠠᠨ ᠤ ᠵᠠᠮ ᠤᠨ ᠠᠩᠬᠠᠨ ᠤ ᠰᠢᠯᠦᠭ᠂ ᠳᠤᠷᠠᠳᠬᠠᠯ ᠳᠤᠷᠠᠰᠤᠮᠵᠢ ᠪᠠᠷ ᠶᠠᠷᠢᠶ᠎ᠠ ᠪᠠᠨ ᠦᠨᠳᠤᠷᠯᠠᠬᠦᠯᠦᠶ᠎ᠡ᠃             ᠳᠤᠭᠳᠠᠰᠢ ᠦᠭᠡᠢ ᠰᠡᠷᠢᠬᠦᠨ ᠨᠠᠮᠤᠷ ᠤᠨ ᠪᠤᠷᠤᠭᠠᠨ ᠲᠠᠢ              ᠳᠤᠯᠤᠭᠠᠨ ᠰᠠᠷ᠎ᠠ ᠶᠢᠨ ᠬᠤᠷᠢᠨ ᠳᠠᠪᠤᠨ᠎ᠠ ︵42 ᠤᠨ ᠤ︶              ᠳᠤᠭᠳᠠᠭᠤᠨ ᠬᠦᠭᠡᠷᠦᠬᠦᠨ ᠰᠤᠷᠤᠭᠴᠢ ᠨᠠᠷ ᠮᠢᠨᠢ              ᠳᠤᠳᠤᠭᠠᠳᠤ ᠰᠡᠳᠬᠢᠯ ᠠᠴᠠ ᠪᠠᠨ ᠪᠠᠶᠠᠷᠯᠠᠨ ᠬᠦᠳᠠᠯᠪᠠ᠃              ᠳᠠᠯᠠᠶᠢᠴᠤᠷᠵᠢ ᠶᠢᠨ ᠴᠠᠮ ᠢ ᠦᠵᠡᠬᠦ ᠪᠠᠷ              ᠳᠠᠩᠴᠦ ᠪᠠᠶᠠᠷ ᠲᠠᠢ ᠬᠦᠳᠡᠯᠦᠭᠰᠡᠨ ᠪᠢᠳᠠ              ᠳᠠᠭᠠᠷᠠᠭᠤᠯᠤᠮᠠᠷ ᠰᠠᠷᠢᠬᠦᠨ ᠨᠠᠮᠤᠷ ᠤᠨ ᠪᠤᠷᠤᠭᠠᠨ              ᠳᠠᠪᠠᠭᠤ ᠶᠡᠭᠡ ᠵᠢᠭᠡᠬᠦᠨ ᠦᠭᠡᠢ ᠳ᠋ᠠ᠃              ᠦᠭᠡᠷ ᠳᠡᠷᠭᠡᠨ ᠤ ᠤᠳᠠᠭᠠᠨ ᠶᠠᠪᠤᠯᠳᠠ              ᠡᠬᠦᠯᠡ ᠲᠠᠢ ᠤᠭᠳᠠᠷᠭᠤᠢ ᠶᠢᠨ ᠰᠡᠷᠢᠬᠦᠨ ᠠᠮᠢᠰᠬᠤᠯ ᠳᠤᠷ              ᠦᠶᠡᠷᠭᠡᠨ ᠨᠠᠭᠠᠳᠬᠤ ᠪᠢᠳᠠ ᠪᠦᠬᠦᠨ ᠤ              ᠤᠷᠤᠭᠰᠢᠯᠠᠬᠤ ᠵᠠᠮ ᠮᠢᠨᠢ ᠳᠦᠷᠭᠡᠨ ᠦᠩᠭᠡᠷᠡᠨ᠎ᠡ᠃              ᠦᠵᠦᠬᠦᠷ ᠬᠢᠵᠠᠭᠠᠷ ᠦᠭᠡᠢ ᠠᠭᠤᠳᠠᠮ ᠳᠠᠯ᠎ᠠ ᠶᠢ              ᠦᠭᠡᠷ  ᠳᠡᠷᠭᠡᠨ ᠢᠶᠠᠷ ᠳᠤᠭᠤᠴᠢᠭᠤᠯᠤᠨ ᠶᠠᠪᠤᠬᠤᠢ ᠳᠤᠷ              ᠦᠢᠮᠡᠯᠳᠤᠨ ᠱᠤᠤᠬᠢᠯᠳᠤᠬᠤ ᠴᠤᠪᠤᠭᠤ ᠰᠤᠷᠤᠭᠴᠢ ᠨᠠᠷ ᠮᠢᠨᠢ              ᠦᠶᠡᠷᠭᠡᠨ ᠨᠠᠭᠠᠳᠤᠭᠰᠠᠭᠠᠷ ᠵᠠᠮ ᠶᠢ ᠬᠤᠷᠤᠭᠠᠨ᠎ᠠ᠃              ᠤᠰᠤ ᠲᠠᠢ ᠬᠤᠳᠳᠤᠭ ᠭᠡᠳ ᠦᠳᠠᠯᠠᠨ ᠪᠠᠭᠤᠭᠰᠠᠨ ᠴᠢᠨᠢ              ᠤᠤᠭᠤᠭᠠᠳ ᠠᠪᠤᠭᠰᠠᠨ ᠨᠢ ᠱᠠᠯ ᠰᠢᠪᠠᠷ ᠡ              ᠤᠷᠮ᠎ᠠ ᠬᠤᠭᠤᠷᠠᠰᠢ ᠦᠭᠡᠢ ᠪᠢᠳᠠ ᠪᠦᠬᠦᠨ              ᠤᠷᠤᠭᠰᠢ ᠶᠠᠪᠤᠬᠤ ᠪᠠᠷ ᠳᠡᠷᠭᠡ ᠪᠠᠨ ᠬᠦᠯᠦᠯ᠎ᠠ᠃              ᠪᠠᠷ᠎ᠠ ᠳᠠᠰᠤᠷᠠᠰᠢ ᠦᠭᠡᠢ ᠴᠠᠯᠠᠶᠢᠨ ᠬᠠᠷᠠᠭᠳᠠᠬᠤ              ᠪᠠᠷᠠᠭᠤᠨ ᠰᠦᠨᠢᠳ ᠤᠨ ᠴᠠᠭᠠᠨ ᠨᠠᠭᠤᠷ ᠡ              ᠪᠠᠯᠠᠷ ᠡᠯᠡᠰᠤ ᠶᠢ ᠳᠤᠭᠤᠯᠤᠨ ᠦᠩᠭᠡᠷᠡᠬᠦ ᠨᠢ              ᠪᠠᠭᠰᠢ ᠰᠤᠷᠤᠭᠴᠢ ᠶᠢᠨ ᠬᠦᠭᠵᠢᠶᠠᠨ ᠴᠡᠩᠭᠡᠯ ᠡ              ᠠᠯᠢᠪᠠ ᠬᠦᠨᠳᠤ ᠪᠠᠨ ᠳᠡᠭᠡᠭᠡᠭᠡᠳ              ᠠᠶᠢᠬᠤᠪᠳᠤᠷ ᠡᠯᠡᠰᠤ ᠶᠢ ᠭᠡᠳᠦᠯᠬᠦᠢ ᠳᠤᠷ              ᠠᠶᠤᠯᠭᠠᠨ ᠭᠤᠶᠠᠳᠠᠨ ᠵᠤᠳᠤᠪᠠᠴᠦ              ᠠᠭᠠᠬᠢᠯᠠᠨ ᠵᠢᠳᠬᠦᠬᠦ ᠦᠭᠡᠷ ᠤᠳ  ᠡ᠃              ᠬᠡᠷᠡᠭᠰᠡᠯ ᠬᠤᠴᠢᠯᠭ᠎ᠠ ᠪᠠᠨ ᠳᠡᠭᠡᠭᠡᠭᠡᠳ              ᠭᠡᠪᠷᠡᠭ ᠡᠯᠡᠰᠤ ᠶᠢ ᠬᠡᠳᠦᠯᠬᠦᠢ ᠳᠤᠷ              ᠬᠡᠯᠡ ᠪᠠᠨ ᠭᠠᠷᠭᠠᠨ ᠵᠢᠳᠬᠦᠬᠦ              ᠬᠦᠨᠳᠤ ᠠᠴᠢᠶᠠᠳᠠᠢ ᠦᠭᠡᠷ ᠤᠳ ᠡ᠃              ᠠᠶᠠᠨ ᠤ ᠵᠠᠮ ᠳᠤ ᠤᠨᠤᠬᠤ ᠪᠠᠷ              ᠠᠪᠴᠦ ᠢᠷᠡᠭᠰᠡᠨ ᠭᠤᠷᠪᠠᠨ ᠮᠤᠷᠢ ᠶᠢ              ᠠᠳᠤᠭᠤᠨ ᠳᠤ ᠳᠤᠷᠠᠳᠠᠢ ᠰᠤᠷᠤᠭᠴᠢ ᠨᠠᠷ ᠮᠢᠨᠢ              ᠠᠮᠤᠰᠬᠢᠯᠭᠡᠬᠦ ᠦᠭᠡᠢ ᠭᠤᠶᠤᠨ ᠤᠨᠤᠯᠤᠭ᠎ᠠ᠃              ᠠᠶᠠᠨ ᠤ ᠳᠡᠷᠭᠡ ᠶᠢ ᠬᠦᠳᠡᠯᠬᠦ ᠪᠠᠷ              ᠠᠯᠪᠠᠨ ᠳᠤ ᠢᠷᠡᠭᠰᠡᠨ ᠡᠪᠦᠭᠡᠨ ᠭᠤᠸᠠᠢ              ᠠᠯᠠᠭ ᠦᠭᠡᠷ ᠢᠶᠠᠨ ᠬᠦᠳᠦᠯᠦᠭᠡᠳ              ᠠᠴᠢᠶᠠᠳᠠᠢ ᠳᠡᠷᠭᠡ ᠶᠢ ᠳᠠᠭᠠᠨ᠎ᠠ᠃              ᠦᠷᠪᠦᠭᠡᠷ ᠦᠷᠪᠦᠭᠡᠷ ᠳᠤᠪᠤᠴᠠᠭ ᠤᠳ ᠢ              ᠦᠪᠴᠢ ᠴᠢᠮᠡᠭᠯᠡᠨ ᠪᠦᠷᠬᠦᠭᠰᠡᠨ              ᠦᠩᠭᠡ ᠦᠩᠭᠡ ᠪᠠᠷ ᠨᠤᠭᠤᠭᠠᠷᠠᠬᠤ              ᠦᠷᠪᠦᠭᠡᠷ ᠨᠠᠮᠠᠭ᠎ᠠ ᠲᠠᠢ ᠪᠤᠳᠠᠷᠭᠠᠨ᠎ᠠ᠃              ᠳᠠᠩᠬᠡᠶᠢᠨ ᠬᠠᠷᠠᠭᠳᠠᠬᠤ ᠠᠭᠤᠯᠠ ᠶᠢᠨ ᠳᠤᠯᠤᠭᠠᠢ ᠳᠤ              ᠳᠡᠪᠡᠨᠡᠬᠦᠷ ᠡᠬᠦᠯᠡ ᠦᠶᠡᠯᠡᠨ ᠨᠡᠬᠦᠭᠡᠳ              ᠳᠠᠯᠡᠭᠡᠢ ᠶᠢ ᠰᠡᠷᠢᠬᠦᠴᠡᠬᠦᠯᠦᠮᠡᠷ ᠨᠠᠮᠤᠷ ᠤᠨ ᠪᠤᠷᠤᠭᠠᠨ ᠳᠤ              ᠳᠡᠷᠡᠰᠤᠨ ᠳᠤᠯᠤᠭᠠᠢ ᠴᠠᠶᠢᠷᠠᠨ ᠭᠠᠩᠬᠤᠨ᠎ᠠ᠃              ᠦᠶᠡᠯᠡᠨ ᠤᠨᠳᠤᠷᠬᠤ ᠪᠤᠷᠤᠭᠠᠨ ᠤ ᠡᠬᠦᠯᠡ              ᠦᠳᠡᠰᠢ ᠪᠤᠯᠬᠤᠶ᠎ᠠ ᠨᠢᠮᠭᠡᠷᠡᠨ ᠨᠡᠮᠦᠶᠢᠭᠡᠳ              ᠦᠵᠡᠬᠦᠶ᠎ᠠ ᠬᠦᠰᠡᠭᠳᠡᠬᠦ ᠨᠠᠷᠠᠨ ᠤ ᠭᠡᠷᠡᠯ              ᠡᠬᠦᠯᠡᠨ ᠤ ᠵᠠᠪᠰᠠᠷ ᠢᠶᠠᠷ ᠴᠠᠶᠢᠷᠠᠨ ᠴᠤᠬᠤᠶᠢᠨ᠎ᠠ᠃              ᠰᠠᠩ ᠤᠨ ᠤᠪᠤᠭ᠎ᠠ ᠶᠢ ᠪᠠᠷᠠᠯᠠᠨ ᠶᠠᠪᠤᠬᠤᠢ ᠳᠤᠷ              ᠰᠠᠨᠰᠠᠷ ᠳᠡᠭᠷᠢ ᠴᠡᠯᠮᠡᠭ ᠳᠤᠩᠭᠠᠯᠠᠭ              ᠰᠠᠷᠠᠭᠤᠯ ᠰᠡᠷᠬᠦᠯᠡᠩ ᠰᠤᠷᠤᠭᠴᠢ ᠨᠠᠷ ᠮᠢᠨᠢ              ᠰᠠᠷᠠ ᠲᠠᠢ ᠰᠦᠨᠢ ᠪᠠᠷ ᠠᠶᠠᠯᠠᠨ ᠪᠤᠴᠠᠨ᠎ᠠ᠃              ᠪᠤᠳᠠᠷᠠᠨ ᠬᠠᠶᠠᠯᠠᠬᠤ ᠴᠠᠰᠤ ᠶᠢ ᠰᠠᠨᠠᠭᠳᠠᠭᠤᠯᠤᠮᠠᠷ              ᠪᠤᠵᠠᠭᠠᠢ ᠵᠢᠭᠡᠬᠦᠨ ᠳᠤ ᠬᠦᠳᠦᠯᠦᠭᠰᠡᠨ ᠪᠢᠳᠠ              ᠪᠤᠷᠬᠠᠨ ᠳᠠᠭᠠᠨ ᠮᠦᠷᠬᠦᠭᠡᠳ ᠴᠠᠮ ᠢᠶᠠᠨ ᠦᠵᠡᠭᠡᠳ              ᠪᠤᠴᠠᠭᠠᠳ ᠶᠠᠪᠤᠬᠤᠢ ᠳᠤᠷ ᠠᠭᠠᠷ ᠳᠤᠩᠭᠠᠯᠠᠭ ᠡ᠃               ᠡᠷᠬᠢᠨ ᠮᠦᠷᠬᠦᠨ ᠶᠠᠪᠤᠭᠰᠠᠭᠠᠷ               ᠡᠷᠬᠢᠵᠦ ᠨᠠᠰᠢ ᠪᠠᠨ ᠪᠤᠴᠠᠬᠤᠢ ᠳᠤ               ᠡᠩᠬᠦᠷᠡᠶᠢᠯᠡᠨ ᠬᠦᠭᠡᠷᠦᠬᠦᠶᠢᠯᠡᠨ ᠤᠯᠤᠭᠰᠠᠨ               ᠡᠷᠢᠶᠠᠨ ᠠᠯᠠᠭ ᠵᠤᠯᠵᠠᠭᠠᠨ ᠮᠤᠤᠷ ᠡ᠃               ᠡᠷᠬᠢᠯᠡᠨ ᠢᠷᠡᠭᠰᠡᠨ ᠰᠦᠮ᠎ᠡ ᠠᠴᠠ ᠪᠠᠨ ᠪᠤᠴᠠᠬᠤᠢ ᠳᠤᠷ               ᠡᠭᠡᠰᠢᠭᠳᠦ ᠳᠠᠭᠤᠤ ᠪᠠᠨ ᠳᠠᠭᠤᠯᠠᠯᠴᠠᠨ ᠬᠦᠳᠡᠯᠦᠯ᠎ᠠ               ᠡᠷᠬᠢᠨ ᠬᠠᠷᠠᠭᠰᠠᠭᠠᠷ ᠶᠠᠪᠤᠬᠤᠢ ᠳᠤ               ᠡᠩᠨᠡᠷᠡᠭᠰᠡᠨ ᠮᠦᠷᠬᠦᠯᠴᠢᠳ ᠢᠷᠠᠶᠢᠨ ᠵᠤᠭᠰᠤᠭ᠎ᠠ᠃               ᠵᠢᠷᠭᠤᠭᠠᠨ ᠡᠳᠦᠷ ᠤᠨ ᠠᠶᠠᠨ ᠢᠶᠠᠨ ᠳᠡᠬᠦᠰᠭᠡᠭᠡᠳ               ᠵᠤᠭᠠᠳᠠᠢ ᠳᠠᠭᠤᠤ ᠪᠠᠨ ᠳᠠᠭᠤᠯᠠᠨ ᠬᠠᠷᠢᠬᠤᠢ ᠳᠤ               ᠵᠢᠷᠤᠭ ᠰᠢᠯᠪᠤᠯᠤᠷ ᠰᠢᠭ ᠦᠵᠡᠰᠬᠦᠯᠡᠩ ᠡᠬᠦᠯᠡ ᠨᠢ               ᠵᠤᠯᠠᠭᠰᠠᠨ ᠬᠦᠪᠤᠩ ᠰᠢᠭ ᠰᠠᠮᠡᠶᠢᠨ ᠬᠡᠷᠡᠯᠳᠤᠨ᠎ᠠ᠃        1943 ᠤᠨ ᠤ ᠳᠤᠯᠤᠭᠠᠨ ᠰᠠᠷ᠎ᠠ ᠶᠢᠨ ᠬᠤᠷᠢᠨ ᠭᠤᠷᠪᠠᠨ᠎ᠠ ᠳᠤᠭᠤᠭᠠᠳᠤ ᠰᠦᠮ᠎ᠡ ᠶᠢᠨ ᠴᠠᠮ ᠦᠵᠡᠬᠦ  ᠪᠠᠷ ᠠᠶᠠᠨ ᠤ ᠳᠡᠷᠭᠡ ᠪᠠᠨ ᠬᠦᠯᠵᠦ᠂ ᠠᠯᠤᠰ ᠤᠨ ᠵᠠᠮ ᠶᠢ ᠳᠤᠭᠤᠯᠬᠤ ᠳᠠᠭᠠᠨ ᠵᠢᠷᠭᠤᠭᠠᠨ ᠠᠩᠬᠢ ᠶᠢᠨ ᠬᠤᠶᠠᠷ ᠵᠠᠭᠤ ᠭᠠᠷᠤᠢ ᠰᠤᠷᠤᠭᠴᠢ ᠶᠢ ᠳᠠᠭᠠᠭᠤᠯᠵᠦ          ᠰᠠᠪ ᠶᠡᠭᠡᠳᠠᠢ ᠶᠢᠷᠳᠢᠨᠴᠤ ᠳᠤᠷ ᠱᠤᠮᠪᠠᠨ ᠤᠷᠤᠭᠠᠳᠤᠢ          ᠰᠡᠷᠬᠦᠯᠡᠩ ᠬᠦᠭᠡᠷᠦᠬᠦᠨ ᠱᠠᠪᠢᠨᠠᠷ ᠡ          ᠰᠡᠳᠬᠢᠯ ᠪᠠᠶ᠎ᠠ ᠢᠶᠠᠨ ᠪᠦᠷᠢᠨ ᠦᠰᠭᠡᠵᠦ          ᠰᠡᠷᠬᠦᠭᠡᠨ ᠰᠤᠷᠴᠦ ᠬᠦᠮᠦᠵᠢᠵᠡᠭᠡᠶ᠎ᠡ ᠭᠡᠮᠡᠨ ᠡᠩᠬᠦᠷᠡᠶᠢᠯᠡᠨ ᠬᠠᠯᠠᠮᠵᠢᠯᠠᠵᠦ᠂ ᠳᠦᠷᠦᠭᠰᠡᠨ ᠨᠤᠳᠤᠭ ᠤᠨ ᠮᠢᠨᠢ ᠨᠤᠶᠠᠨ ᠤᠷᠬᠢᠯ ᠳᠠᠪᠤᠨ ᠬᠠᠶᠢᠷᠬᠠᠨ ᠢᠶᠠᠨ ᠠᠯᠠᠭᠠᠨ ᠵᠢᠷᠤᠭᠠᠰᠤ ᠰᠢᠭ᠋ ᠢᠶᠠᠨ ᠵᠢᠷᠤᠭᠯᠠᠨ ᠦᠯᠡᠳᠡᠭᠡᠵᠦ᠂ ᠠᠮᠢᠳᠤᠷᠠᠯ ᠳᠤ ᠬᠤᠨᠤᠭᠰᠢᠭᠰᠠᠨ ᠠᠶᠠᠨ ᠤ ᠰᠢᠯᠦᠭ ᠡᠷᠬᠢᠨ᠎ᠡ ᠰᠠᠨᠠᠭᠳᠠᠨ᠎ᠠ᠃         ᠪᠠᠶᠠᠷᠯᠠᠯᠳᠤᠨ ᠴᠡᠩᠭᠡᠯᠳᠤᠨ ᠠᠶᠠᠯᠠᠭᠠᠳ         ᠪᠠᠷᠠᠭᠤᠨ ᠬᠤᠶᠢᠳᠤ ᠳᠡᠭᠡᠷ᠎ᠡ ᠠᠪᠠᠷᠢᠬᠤᠢ ᠳᠤᠷ         ᠪᠠᠷ᠎ᠠ ᠬᠠᠷᠠᠭᠳᠠᠨ ᠬᠦᠭᠡᠷᠡᠬᠦ         ᠪᠠᠶᠠᠨ ᠪᠤᠭᠳᠠ ᠶᠢᠨ ᠤᠪᠤᠭ᠎ᠠ ᠳ᠋ᠠ         ᠳᠠᠪᠤᠭᠤᠯᠠ ᠠᠷᠪᠠᠭᠤᠯᠠ ᠨᠠᠭᠠᠳᠤᠯᠴᠠᠨ         ᠳᠠᠯ᠎ᠠ ᠶᠢ ᠳᠤᠭᠤᠯᠤᠨ ᠠᠶᠠᠯᠬᠤᠢ ᠳᠤ         ᠳᠠᠭᠠᠳᠠᠢ ᠰᠠᠶᠢᠬᠠᠨ ᠬᠠᠷᠠᠬᠳᠠᠬᠤ         ᠳᠠᠷᠭᠤᠨ ᠬᠤᠩᠭᠤᠷ ᠬᠠᠶᠢᠷᠬᠠᠨ ᠳ᠋ᠠ᠃         ᠰᠦᠷᠡᠭᠡᠢ ᠠᠭᠤᠳᠠᠮ ᠵᠢᠷᠪᠡᠭᠡᠨᠡᠬᠦ         ᠰᠠᠬᠦᠵᠢ ᠶᠢᠨ ᠳᠠᠯ᠎ᠠ ᠶᠢᠨ ᠬᠦᠪᠡᠭᠡᠨ ᠳᠤ         ᠰᠦᠮᠡᠯᠵᠡᠨ ᠬᠦᠭᠡᠷᠡᠨ ᠬᠤᠰᠢᠭᠤᠷᠠᠬᠤ         ᠰᠦᠷᠯᠢᠬᠦᠨ ᠨᠤᠭᠤᠭᠠᠨ ᠬᠠᠶᠢᠷᠬᠠᠨ ᠳ᠋ᠠ᠃         ᠳᠦᠪᠰᠢᠨ ᠳᠠᠯ᠎ᠠ ᠶᠢᠨ ᠬᠢᠵᠠᠭᠠᠷ ᠲᠤ         ᠳᠦᠳᠠ ᠦᠭᠡᠢ ᠬᠤᠯᠠ ᠪᠠᠶᠢᠪᠠᠴᠤ         ᠳᠦᠩᠬᠡᠶᠢᠨ ᠬᠦᠭᠡᠷᠡᠨ ᠬᠠᠷᠠᠭᠳᠠᠬᠤ         ᠳᠦᠬᠦᠷᠡᠩ ᠦᠯᠵᠡᠢ ᠬᠠᠶᠢᠷᠬᠠᠨ ᠳ᠋ᠠ         ᠳᠠᠪᠬᠤᠷ ᠳᠠᠪᠬᠤᠷ ᠰᠢᠯᠢ ᠶᠢ         ᠳᠠᠪᠠᠨ ᠠᠪᠠᠷᠢᠨ ᠭᠠᠷᠬᠤᠢ ᠳᠤᠷ         ᠳᠠᠩᠴᠦ ᠰᠠᠶᠢᠬᠠᠨ ᠬᠠᠷᠠᠭᠳᠠᠬᠤ         ᠳᠢᠶᠠᠨᠴᠢ ᠯᠠᠮᠠᠬᠠᠢ ᠶᠢᠨ ᠠᠭᠤᠯᠠ ᠳ᠋ᠠ᠃        ᠨᠤᠳᠤᠭ ᠢᠶᠠᠨ ᠪᠠᠷᠠᠭᠠᠯᠠᠨ ᠠᠶᠠᠨ ᠤ ᠵᠠᠮ ᠤᠨ ᠶᠠᠳᠠᠷᠠᠭ᠎ᠠ ᠪᠠᠨ ᠮᠠᠷᠳᠠᠨ ᠡᠯᠢᠭᠡᠨ ᠬᠠᠶᠢᠷᠠᠳᠠᠢ ᠡᠭᠡ ᠰᠤᠷᠭᠠᠭᠤᠯᠢ ᠶᠢᠨ ᠢᠶᠠᠨ ᠭᠡᠷᠡᠯ ᠰᠠᠴᠤᠷᠠᠩᠭᠤᠢ ᠨᠢᠭᠡᠨ ᠵᠠᠭᠤᠨ ᠤ ᠮᠠᠷᠳᠠᠵᠦ ᠴᠢᠳᠠᠬᠤ ᠦᠭᠡᠢ ᠳᠡᠦᠭᠡ᠂ ᠠᠮᠢᠳᠤᠷᠠᠯ ᠪᠠ ᠤᠶᠠᠩᠭ᠎ᠠ ᠰᠢᠯᠦᠭ ᠢ ᠤᠩᠰᠢᠭᠴᠢᠳ ᠤᠨ ᠠᠯᠠᠭᠠᠨ ᠳᠤ ᠡᠷᠬᠦᠨ ᠪᠠᠷᠢᠶ᠎ᠠ᠃
  
ᠢᠷᠡᠯᠲᠡ᠄ ᠰᠢᠯᠤᠭᠤᠨ ᠬᠥᠬᠡ ᠬᠤᠰᠢᠭᠤᠨ ᠤ ᠵᠠᠰᠠᠭ ᠤᠨ ᠣᠷᠳᠣᠨ ᠤ ᠮᠤᠩᠭᠤᠯ ᠰᠥᠯᠵᠢᠶ᠎ᠡ
 
 
ᠬᠠᠮᠢᠶ᠎ᠠ ᠪᠥᠬᠦᠢ ᠰᠤᠨᠢᠨ
  
ᠡᠵᠡᠨ ᠳᠡᠭᠡᠨ ᠡᠭᠡᠭᠰᠡᠨ ᠪᠡᠯᠡᠭ
ᠬᠠᠭᠤᠴᠢᠨ ᠣᠨ ᠤ ᠪᠣᠱᠣᠭᠠᠨ ᠳᠤ
ᠠᠯᠳᠡᠨᠪᠢᠯᠢᠭ
ᠲᠠᠭᠣᠣ _ᠱᠠᠩᠳᠣ ᠶᠢᠨ ᠭᠣᠣᠯ
ᠨᠠᠢᠮᠠᠨ ᠰᠢᠷᠭ᠎ᠠ
ᠥᠪᠦᠷ ᠮᠣᠩᠭᠤᠯ ᠤᠨ ᠥᠪᠡᠷᠳᠡᠭᠡᠨ ᠵᠠᠰᠠᠬᠤ ᠣᠷᠣᠨ ᠤ ᠠᠷᠠᠳ ᠤᠨ ᠵᠠᠰᠠᠭ ᠤᠨ ᠣᠷᠳᠣᠨ ᠠᠴᠠ ᠭᠤᠤᠯᠴᠢᠯᠠᠨ ᠡᠷᠬᠢᠯᠡᠪᠡ ᠥᠪᠦᠷ ᠮᠣᠩᠭᠤᠯ ᠤᠨ ᠥᠪᠡᠷᠳᠡᠭᠡᠨ ᠵᠠᠰᠠᠬᠤ ᠣᠷᠣᠨ ᠤ ᠠᠷᠠᠳ ᠤᠨ ᠵᠠᠰᠠᠭ ᠤᠨ ᠤᠷᠳᠤᠨ ᠤ ᠠᠯᠪᠠᠨ ᠲᠢᠩᠬᠢᠮ ᠠᠴᠠ ᠲᠠᠭᠠᠭᠠᠴᠢᠯᠠᠨ ᠡᠷᠬᠢᠯᠡᠪᠡ ᠃ ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠮᠡᠷᠭᠡᠵᠢᠯ ᠬᠠᠩᠭᠠᠪᠠ᠃ ᠰᠢᠤᠳᠠᠨ ᠳ᠋ᠤᠭᠠᠷ: 010098    蒙ICP备05000248号