ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠣᠶᠢᠯᠡᠴᠢᠯᠡᠭᠡ
ᠰᠣᠶᠣᠯ ᠡᠷᠳᠡᠨᠢ
ᠲᠦᠷᠪᠡᠳ ᠮᠤᠩᠭᠤᠯᠴᠤᠳ ᠤᠨ ᠬᠤᠷᠠᠭ᠎ᠠ ᠵᠠᠰᠠᠬᠤ ᠲᠠᠢ ᠬᠤᠯᠪᠤᠭᠳᠠᠭᠰᠠᠨ ᠵᠠᠩ ᠦᠢᠯᠡ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2018/1/22
     ᠬᠠᠭᠤᠴᠢᠨ ᠵᠠᠩᠰᠢᠯ ᠢᠶᠠᠷ ᠢᠶᠠᠨ ᠮᠤᠩᠭᠤᠯ ᠨᠤᠲᠤᠭ ᠤᠨ ᠬᠠᠪᠤᠷ ᠤᠨ ᠰᠡᠭᠦᠯ ᠰᠠᠷ᠎ᠠ ᠪᠤᠶᠤ ᠵᠤᠨ ᠤ ᠡᠬᠢᠨ ᠰᠠᠷ᠎ᠠ ᠳᠤ ᠨᠢᠭᠦᠯ ᠬᠢᠯᠢᠨᠴᠡ ᠬᠢᠳᠡᠭ ᠦᠭᠡᠢ᠂ ᠠᠮᠢᠲᠠᠨ ᠬᠤᠷᠤᠭᠠᠳᠠᠭ ᠦᠭᠡᠢ ᠴᠡᠭᠡᠷ ᠲᠠᠢ ᠪᠤᠯᠬᠤᠷ ᠡᠨᠡ ᠰᠠᠷ᠎ᠠ ᠶᠢ ᠰᠠᠬᠢᠳᠠᠸ᠎ᠠ ᠭᠡᠵᠤ ᠨᠡᠷᠡᠯᠡᠳᠡᠭ᠃ ᠡᠨᠡ ᠪᠣᠯ ᠬᠠᠭᠤᠴᠢᠨ ᠲᠤᠭᠠᠯᠠᠯ ᠤᠨ ᠲᠦᠷᠪᠡᠳᠦᠭᠡᠷ ᠰᠠᠷ᠎ᠠ ᠪᠤᠯᠤᠨ᠎ᠠ᠃ ᠡᠨᠡ ᠰᠠᠷ᠎ᠠ ᠳᠤ ᠡᠪᠡᠰᠦ ᠨᠤᠭᠤᠭᠠᠷᠠᠵᠤ ᠢᠰᠢᠭᠡ ᠬᠤᠷᠠᠭ᠎ᠠ ᠨᠢᠯᠬ᠎ᠠ ᠨᠤᠭᠤᠭᠠᠨ ᠳᠤ ᠴᠠᠳᠴᠦ ᠪᠠᠶᠢᠳᠠᠭ ᠪᠢᠯᠡ᠃      ᠬᠤᠷᠠᠭ᠎ᠠ ᠢᠰᠢᠭᠡ ᠬᠦᠩᠭᠡᠯᠡᠬᠦ ᠶᠢ ᠲᠦᠷᠪᠡᠳ ᠨᠤᠲᠤᠭ ᠲᠤ ︽ᠴᠠᠭᠠᠯᠠᠬᠤ᠂ ᠵᠠᠰᠠᠬᠤ᠂ ᠬᠦᠩᠭᠡᠯᠡᠬᠦ︾ ᠭᠡᠵᠤ ᠨᠡᠷᠡᠯᠡᠳᠡᠭ᠃ ᠬᠠᠭᠤᠴᠢᠨ ᠤᠯᠠᠷᠢᠯ ᠤᠨ ᠰᠢᠨ᠎ᠡ ᠶᠢᠨ ᠶᠢᠰᠦᠨ᠂ ᠠᠷᠪᠠᠨ ᠨᠢᠭᠡᠨ᠂ ᠠᠷᠪᠠᠨ ᠲᠤᠯᠤᠭᠠᠨ᠂ᠬᠤᠷᠢᠨ ᠨᠢᠭᠡᠨ᠂ ᠬᠤᠷᠢ ᠶᠢᠰᠦᠨ ᠳᠤ ᠴᠠᠭᠠᠯᠠᠨ᠎ᠠ᠃ ᠵᠠᠷᠢᠮ ᠭᠠᠵᠠᠷ ᠡᠳᠦᠷ ᠰᠤᠳᠤᠷ ᠦᠵᠡᠭᠦᠯᠵᠤ᠂ ᠲᠠᠥᠯᠠᠢ᠂ᠪᠡᠴᠢᠨ᠂ ᠮᠤᠷᠢᠨ ᠵᠡᠷᠭᠡ ᠡᠳᠦᠷ ᠢ ︽ᠬᠦᠩᠭᠡᠨ ᠬᠤᠷᠳᠤᠨ ᠰᠠᠶᠢᠨ ᠡᠳᠦᠷ︾ ᠭᠡᠵᠤ ᠬᠤᠷᠠᠭ᠎ᠠ ᠢᠰᠢᠭᠡ ᠪᠠᠨ ᠵᠠᠰᠠᠳᠠᠭ᠃          ᠬᠤᠷᠠᠭ᠎ᠠ ᠪᠠᠨ ᠵᠠᠰᠠᠬᠤ ᠶᠢᠨ ᠤᠷᠢᠳᠠᠯ ᠨᠢ ᠲᠤᠰᠬᠠᠢ ᠬᠤᠷᠠᠭ᠎ᠠ ᠢᠰᠢᠭᠡ ᠬᠦᠩᠭᠡᠯᠡᠭᠴᠢ ᠪᠠᠨ ᠵᠠᠯᠠᠵᠤ ᠢᠷᠡᠨ᠎ᠡ᠃ ᠵᠠᠯᠠᠭᠰᠠᠨ ᠬᠦᠮᠦᠨ ᠢᠶᠠᠨ ᠬᠦᠨᠳᠦᠯᠡᠵᠤ᠂ ᠢᠳᠡᠭᠡᠨ ᠤ ᠳᠡᠭᠡᠵᠢ ᠪᠠᠨ ᠰᠢᠷᠡᠭᠡ ᠲᠦᠭᠦᠷᠡᠩ ᠦᠷᠦᠵᠤ᠂ ᠴᠠᠢ ᠠᠶᠠᠭᠠᠯᠠᠵᠤ ᠴᠠᠭᠠᠨ ᠢᠳᠡᠭᠡ ᠠᠮᠰᠠᠭᠤᠯᠤᠨ᠂ ᠠᠷᠢᠬᠢ ᠪᠠᠷᠢᠵᠤ᠂ ᠴᠠᠭᠠᠨ ᠬᠠᠳᠠᠭ ᠲᠡᠭᠡᠷ᠎ᠡ ᠲᠤᠷᠭ᠎ᠠ ᠴᠠᠢ ᠪᠤᠶᠤ ᠵᠤᠭᠤᠰ ᠮᠦᠩᠭᠦ ᠲᠠᠯᠪᠢᠨ ᠪᠡᠯᠡᠭ ᠪᠠᠷᠢᠨ᠎ᠠ᠃ ᠵᠠᠷᠢᠮ ᠬᠦᠮᠦᠨ ᠤ ᠭᠠᠷ ᠬᠦᠨᠳᠦ ᠭᠡᠵᠤ ᠬᠦᠩᠭᠡᠯᠡᠭᠰᠡᠨ ᠬᠤᠷᠠᠭ᠎ᠠ ᠢᠰᠢᠭᠡᠨ ᠤ ᠡᠰᠭᠡᠭᠰᠡᠨ ᠤᠷᠤᠮ ᠨᠢ ᠰᠢᠷᠬᠠᠯᠠᠵᠤ ᠬᠠᠪᠤᠳᠤᠬᠤ ᠪᠤᠶᠤ ᠦᠭᠡᠷᠢᠯᠡᠵᠤ ᠬᠠᠯᠠᠭᠤᠷᠠᠭᠠᠳ ᠦᠬᠦᠵᠤ ᠭᠡᠮᠳᠦᠬᠦ ᠤᠴᠢᠷ ᠭᠠᠷᠳᠠᠭ ᠲᠤᠯᠠ ᠬᠦᠩᠭᠡᠨ ᠭᠠᠷ ᠲᠠᠢ ᠬᠦᠮᠦᠨ ᠵᠠᠯᠠᠬᠤ ᠨᠢ ᠮᠠᠰᠢ ᠴᠢᠬᠤᠯᠠ ᠪᠠᠶᠢᠳᠠᠭ᠃ ᠢᠩᠬᠢᠵᠤ ᠵᠠᠯᠠᠭᠰᠠᠨ ᠬᠦᠮᠦᠨ ᠢᠶᠠᠨ ᠬᠦᠨᠳᠤᠯᠡᠨ ᠵᠤᠴᠢᠯᠠᠭᠰᠠᠨ ᠤ ᠲᠠᠷᠠᠭ᠎ᠠ ᠡᠮᠦᠨ᠎ᠡ ᠨᠢ ᠰᠠᠭᠤᠯᠭ᠎ᠠ᠂ ᠵᠠᠰᠠᠭᠠᠨ ᠤ ᠬᠢᠳᠤᠭ᠎ᠠ᠂ ᠴᠠᠭᠠᠨ ᠬᠤᠨᠢᠨ ᠤ ᠨᠤᠤᠰᠤ ᠵᠡᠷᠭᠡ ᠶᠢ ᠲᠠᠯᠪᠢᠵᠤ ᠦᠭᠬᠦ ᠳᠤ ᠲᠡᠷᠡ ᠬᠦᠮᠦᠨ ᠴᠠᠭᠠᠨ ᠨᠤᠤᠰᠤ ᠪᠠᠷ ᠪᠤᠷᠤᠭᠤ ᠡᠷᠴᠢᠲᠡᠢ ᠤᠳᠠᠰᠤ ᠲᠠᠮᠤᠵᠤ᠂ ᠰᠠᠭᠤᠯᠭ᠎ᠠ ᠶᠢᠨ ᠠᠮᠠ ᠶᠢ ᠭᠤᠷᠪᠠ ᠤᠷᠢᠶᠠᠵᠤ᠂ ᠰᠠᠭᠤᠯᠭ᠎ᠠ ᠶᠢᠨ ᠤᠭᠤᠰᠤᠷ ᠠᠴᠠ ᠬᠠᠳᠠᠭ ᠤᠶᠠᠵᠤ ᠮᠢᠯᠢᠶᠠᠨ᠎ᠠ᠃ ᠬᠢᠳᠤᠭᠠᠨ ᠤ ᠪᠠᠨ ᠡᠰᠢ ︵ᠵᠠᠷᠢᠮ ᠨᠢ ᠥᠪᠡᠷ ᠤᠨ ᠲᠤᠰᠬᠠᠢ ᠵᠠᠰᠠᠭᠠᠨ ᠤ ᠬᠢᠲᠤᠭ᠎ᠠ ᠲᠠᠢ︶ ᠶᠢ ᠪᠠᠰᠠ ᠤᠷᠢᠶᠠᠨ᠎ᠠ᠃ ᠭᠡᠷ ᠤᠨ ᠡᠵᠡᠨ ᠠᠴᠠ ᠵᠠᠰᠠᠭᠠᠨ ᠤ ᠰᠠᠭᠤᠯᠭ᠎ᠠ ᠶᠢᠨ ᠢᠷᠤᠭᠠᠷ ᠲᠤ ᠠᠳᠬᠤ ᠲᠦᠭᠦᠬᠡᠢ ᠪᠤᠳᠠᠭ᠎ᠠ ᠬᠢᠵᠤ᠂ ᠰᠦ ᠲᠤᠰᠤᠭᠠᠨ᠎ᠠ᠃ ᠡᠨᠡ ᠨᠢ ᠦᠷ᠎ᠡ ᠦᠷᠡᠯᠡᠵᠤ ᠦᠨᠳᠦᠰᠦᠯᠡᠨ᠂ ᠮᠠᠯ ᠰᠥᠷᠥᠭ ᠢᠶᠠᠨ ᠪᠤᠳᠠᠭ᠎ᠠ ᠰᠢᠭ ᠤᠯᠠᠨ ᠦᠷᠡᠵᠢᠬᠦ ᠶᠢ ᠪᠡᠯᠭᠡᠳᠡᠵᠤ ᠪᠠᠶᠢᠭ᠎ᠠ ᠭᠡᠳᠡᠭ᠃         ᠬᠤᠨᠢᠨ ᠤ ᠬᠠᠰᠢᠶᠠᠨ ᠲᠤᠮᠳᠠ ᠴᠠᠭᠠᠨ ᠢᠰᠡᠭᠡᠢ ᠲᠡᠪᠢᠰᠴᠦ᠂ ᠬᠦᠩᠭᠡᠯᠡᠳᠡᠭ ᠬᠦᠮᠦᠨ ᠢᠶᠠᠨ ᠵᠠᠯᠠᠵᠤ ᠰᠠᠭᠤᠯᠭᠠᠭᠠᠳ ᠬᠤᠷᠠᠭ᠎ᠠ ᠪᠠᠨ ᠪᠠᠷᠢᠵᠤ ᠢᠷᠡᠭᠡᠳ ᠭᠤᠤᠯᠯᠠᠨ ᠤᠨᠠᠭᠠᠵᠤ ᠲᠦᠷᠪᠡᠨ ᠬᠦᠯ ᠢ ᠨᠢ ᠪᠠᠭᠯᠠᠨ ᠪᠠᠷᠢᠵᠤ ᠬᠠᠮᠵᠢᠨ᠎ᠠ᠃ ᠬᠤᠪᠤᠩ ᠳᠤ ᠬᠦᠷᠵᠡᠩ ᠤᠨ ᠴᠤᠭ ᠠᠪᠴᠤ᠂ ᠲᠡᠭᠡᠷ᠎ᠡ ᠨᠢ ᠰᠢᠷ᠎ᠠ ᠲᠤᠰᠤ᠂ ᠨᠦᠢᠳᠠᠨ ᠦᠷᠦᠮ᠎ᠡ ᠵᠡᠷᠭᠡ ᠶᠢ ᠤᠭᠤᠭᠢᠭᠤᠯᠤᠨ ᠬᠡᠩᠰᠢᠭᠦᠤ ᠭᠠᠷᠭᠠᠵᠤ᠂ ᠰᠠᠯᠬᠢᠨ ᠲᠡᠭᠡᠷ᠎ᠡ ᠨᠢ ᠤᠳᠤᠭ᠎ᠠ ᠲᠠᠯᠪᠢᠨ᠎ᠠ᠃ ᠡᠨᠡ ᠨᠢ ᠬᠤᠷᠠᠭ᠎ᠠ ᠢᠰᠢᠭᠡ ᠵᠠᠰᠠᠬᠤ ᠳᠤ ᠰᠢᠩᠬᠤ ᠪᠠᠭᠤᠵᠤ᠂ ᠰᠠᠶᠤᠩᠭᠠᠳᠤᠬᠤ ᠠᠴᠠ ᠬᠢᠴᠢᠶᠡᠨ ᠲᠤᠮᠨᠠᠵᠤ ᠪᠠᠶᠢᠬᠤ ᠤᠬᠠᠭᠠᠨᠲᠠᠢ᠃      ᠬᠠᠮᠤᠭ ᠲᠥᠷᠥᠭᠦᠤ ᠬᠦ᠋ᠩᠭᠡᠯᠡᠬᠦ ᠳᠤ ᠢᠰᠢᠭᠡ ᠪᠠᠷᠢᠳᠠᠭ ᠦᠭᠡᠢ᠂ ︽ᠴᠠᠳᠤᠯ᠎ᠠ ᠭᠡᠵᠤ ᠴᠠᠭᠠᠨ ᠢ ᠪᠠᠶᠢᠭ᠂ ᠬᠠᠨᠤᠯ᠎ᠠ ᠭᠡᠵᠤ ᠬᠠᠷ᠎ᠠ ᠶᠢ ᠪᠠᠶᠢᠭ︾ ᠭᠡᠵᠤ ᠲᠡᠭᠰᠢ ᠵᠢᠰᠦᠮ ᠤᠨ ᠬᠤᠷᠠᠭ᠎ᠠ ᠠᠴᠠ ᠡᠬᠢᠯᠡᠨ ᠴᠠᠭᠠᠯᠠᠳᠠᠭ ᠵᠠᠩᠰᠢᠯ ᠲᠠᠢ᠃ ᠪᠠᠭᠠᠨ᠎ᠠ ᠪᠡᠯᠡᠳᠬᠡᠵᠤ᠂ ᠠᠩᠬ᠎ᠠ ᠬᠦᠩᠭᠡᠯᠡᠭᠰᠡᠨ ᠬᠤᠷᠠᠭ᠎ᠠ ᠪᠠᠨ ᠰᠦ ᠪᠠᠷ ᠮᠢᠯᠢᠶᠠᠵᠤ᠂ ︽ᠪᠠᠭᠠᠨ᠎ᠠ ᠶᠢᠨ ᠪᠠᠷ᠎ᠠ ᠶᠡᠭᠡ᠂ ᠪᠠᠯᠠᠬᠤ ᠶᠢᠨ ᠢᠷᠸ᠎ᠠ ᠪᠠᠭ᠎ᠠ︾ ᠭᠡᠵᠤ ᠰᠢᠪᠰᠢᠭᠡᠳ ᠤᠭᠤᠴᠠᠨ ᠲᠡᠭᠡᠷ᠎ᠡ ᠨᠢ ᠰᠤᠯᠠᠬᠠᠨ ᠲᠡᠪᠰᠢᠵᠤ᠂ ᠪᠠᠭᠠᠨ᠎ᠠ ᠲᠡᠭᠡᠭᠦᠷ ᠠᠯᠬᠤᠭᠤᠯᠵᠤ ᠲᠤᠮᠨᠠᠨ᠎ᠠ᠂ ᠡᠨᠡ ᠨᠢ ᠮᠠᠰᠢ ᠭᠦᠨ ᠪᠡᠯᠭᠡᠳᠡᠯ ᠤᠨ ᠤᠳᠬ᠎ᠠ ᠲᠠᠢ ᠠᠵᠠᠢ᠃ ᠬᠤᠷᠠᠭ᠎ᠠ ᠢᠰᠢᠭᠡ ᠶᠢ ᠬᠦᠩᠭᠡᠯᠡᠵᠤ ᠪᠠᠶᠢᠭ᠎ᠠ ᠨᠢ ᠪᠠᠰᠠ ᠴᠦ ᠲᠡᠭᠦᠨ ᠤ ᠠᠮᠢᠳᠤᠷᠠᠯ ᠤᠨ ᠱᠠᠲᠤ ᠦᠶ᠎ᠡ ᠶᠢᠨ ᠨᠢᠭᠡ ᠵᠠᠭᠠᠭ ᠪᠤᠶᠤ ᠰᠢᠯᠵᠢᠯᠲᠡ ᠶᠤᠮ᠃ ᠬᠦᠩᠭᠡᠯᠡᠬᠦ ᠠᠴᠠ ᠡᠮᠦᠨ᠎ᠡ ᠬᠤᠷᠠᠭ᠎ᠠ ᠢᠰᠢᠭᠡ ᠡᠬᠡ ᠠᠴᠠ ᠲᠦᠷᠦᠭᠰᠡᠨ ᠤᠨᠠᠭᠠᠨ ᠪᠠᠶᠢᠭᠠᠯᠯᠢᠭ ᠲᠦᠷᠬᠦ ᠪᠠᠷ ᠢᠶᠠᠨ ᠪᠠᠶᠢᠭᠰᠠᠨ ᠪᠤᠯ ᠬᠦᠩᠭᠡᠯᠡᠭᠰᠡᠨ ᠠᠴᠠ ᠬᠤᠶᠢᠰᠢ ᠦᠭᠡᠷ᠎ᠡ ᠪᠤᠯᠤᠭᠰᠠᠨ ᠡᠨᠡ ᠤᠳᠬ᠎ᠠ ᠶᠢ ᠪᠡᠯᠭᠡᠳᠡᠨ ᠢᠯᠡᠳᠬᠡᠬᠦ ᠶᠢᠨ ᠲᠦᠯᠦᠭᠡ ᠪᠠᠭᠠᠨ᠎ᠠ ᠠᠯᠬᠤᠭᠤᠯᠵᠤ ᠲᠡᠮᠳᠡᠭᠯᠡᠳᠡᠭ ᠪᠠᠶᠢᠨ᠎ᠠ᠃       ᠬᠤᠷᠠᠭ᠎ᠠ ᠬᠦᠩᠭᠡᠯᠡᠭᠰᠡᠨ ᠵᠢᠵᠢᠭ ᠬᠢᠳᠤᠭ᠎ᠠ ᠪᠠᠨ ᠴᠠᠭᠠᠨ ᠬᠤᠨᠢᠨ ᠨᠤᠤᠰᠤ ᠪᠠᠷ ᠤᠷᠢᠶᠠᠵᠤ᠂ ᠲᠤᠳᠤᠭᠤᠨ ᠲᠤᠰᠢᠶ᠎ᠠ ᠤᠨᠢᠨ ᠳᠤ ᠬᠠᠪᠴᠢᠭᠤᠯᠤᠨ᠂ ᠲᠤᠯᠤᠭ᠎ᠠ ᠬᠤᠨᠤᠭ ᠬᠦᠨᠳᠡᠳᠡᠭ ᠦᠭᠡᠢ᠃ ᠡᠨᠡ ᠨᠢ ᠬᠤᠶᠠᠷ ᠵᠦᠢᠯ ᠤᠨ ᠤᠳᠬ᠎ᠠ ᠢᠯᠡᠳᠬᠡᠵᠤ ᠪᠠᠶᠢᠭ᠎ᠠ ᠭᠡᠨ᠎ᠡ᠃ ᠨᠢᠭᠡ ᠳᠤ ᠬᠢᠳᠤᠭᠠᠨ ᠳᠤ ᠨᠢᠭᠡ ᠶᠤᠰᠤᠨ ᠤ ᠠᠮᠠᠷᠠᠯᠲᠠ ᠦᠭᠴᠦ ᠪᠠᠶᠢᠭ᠎ᠠ ᠤᠬᠠᠭᠠᠨ ᠲᠠᠢ ᠭᠡᠨ᠎ᠡ᠂ ᠤᠯᠠᠨ ᠬᠤᠷᠠᠭ᠎ᠠ ᠬᠦᠩᠭᠡᠯᠡᠭᠰᠡᠨ ᠬᠢᠲᠤᠭ᠎ᠠ ᠶᠢ ᠴᠦ ᠭᠡᠰᠡᠨ ᠬᠦᠮᠦᠨᠴᠢᠯᠡᠨ ᠰᠡᠳᠬᠢᠵᠤ᠂ ᠠᠮᠠᠷᠠᠭᠤᠯᠵᠤ ᠪᠠᠶᠢᠬᠤ ᠤᠬᠠᠭᠠᠨ ᠲᠠᠢ ᠠᠵᠠᠢ᠃ ᠬᠤᠶᠠᠷ ᠲᠤ ᠬᠢᠲᠤᠭᠠᠨ ᠤ ᠲᠤᠬᠠᠢ ᠲᠤᠮᠤᠭ ᠰᠡᠳᠬᠢᠯᠭᠡᠨ ᠤ ᠡᠭᠦᠳᠡᠨ ᠠᠴᠠ ᠨᠢᠭᠡ ᠶᠤᠰᠤᠨ ᠤ ᠲᠤᠷᠭᠠᠭᠤᠯᠢ ᠬᠢᠵᠦ ᠪᠠᠶᠢᠭ᠎ᠠ ᠭᠡᠨ᠎ᠡ᠂ ᠬᠢᠲᠤᠭ᠎ᠠ ᠪᠠᠷ ᠦᠭᠡᠬᠦ ᠮᠢᠬ᠎ᠠ ᠤᠭᠳᠤᠯᠬᠤ ᠦᠭᠡᠢ ᠤᠳᠠᠭᠠᠨ ᠲᠠᠯᠪᠢᠪᠠᠯ ᠵᠢᠪᠡᠷᠡᠵᠤ᠂ ᠦᠩᠭᠡ ᠴᠢᠷᠠᠢ ᠮᠠᠭᠤᠲᠠᠬᠤ ᠪᠤᠯᠬᠤᠷ ᠡᠵᠡᠨ ᠳᠡᠭᠡᠨ ᠭᠤᠮᠤᠳᠠᠳᠠᠭ ᠭᠡᠳᠡᠭ ᠶᠤᠮ᠃ ᠡᠨᠡ ᠤᠳᠬ᠎ᠠ ᠪᠠᠷ ᠢᠶᠠᠨ ᠬᠤᠷᠠᠭ᠎ᠠ ᠶᠢᠨ ᠡᠬᠡ ᠪᠠᠶᠢᠭᠠᠯᠢ ᠶᠢᠨ ᠤᠨᠠᠭᠠᠨ ᠲᠦᠷᠢ ᠲᠦᠷᠬᠦ ᠶᠢ ᠥᠭᠡᠷᠡᠴᠢᠯᠡᠨ᠂ ᠲᠡᠶᠢᠮᠤ ᠤᠯᠠᠨ ᠬᠤᠷᠠᠭ᠎ᠠ ᠢᠰᠢᠭᠡ ᠬᠦᠩᠭᠡᠯᠡᠭᠰᠡᠨ ᠠᠴᠠ ᠪᠤᠯᠵᠤ ᠲᠤᠯᠤᠭᠠᠨ ᠡᠳᠦᠷ ᠦᠭᠡᠬᠦ ᠮᠢᠬ᠎ᠠ ᠤᠭᠳᠤᠯᠬᠤ ᠦᠭᠡᠢ ᠪᠠᠷ ᠲᠤᠷᠭᠠᠵᠤ ᠪᠠᠶᠢᠭ᠎ᠠ ᠤᠬᠠᠭᠠᠨ ᠲᠠᠢ ᠭᠡᠨ᠎ᠡ᠃ ᠡᠨᠡ ᠮᠡᠲᠥᠴᠢᠯᠡᠨ ᠮᠤᠩᠭᠤᠯ ᠵᠠᠩ ᠦᠢᠯᠡ ᠶᠢᠨ ᠡᠭᠦᠰᠦᠯ ᠤᠨ ᠦᠨᠳᠦᠰᠦ ᠪᠡ ᠮᠠᠯᠴᠢᠨ ᠠᠷᠠᠳ ᠤᠨ ᠮᠢᠨᠢ ᠤᠶᠤᠨ ᠤᠬᠠᠭᠠᠨ ᠤ ᠪᠠᠶᠠᠯᠢᠭ ᠭᠡᠵᠤ ᠭᠠᠶᠢᠬᠠᠭᠠᠳ ᠪᠠᠷᠠᠰᠢ‌ᠥᠭᠡᠢ ᠥᠪ ᠬᠥᠷᠥᠩᠭᠡ ᠪᠠᠶᠢᠳᠠᠭ ᠪᠢᠯᠡ᠃      ᠬᠤᠷᠠᠭᠠᠨ ᠵᠠᠰᠠᠭ᠎ᠠ ᠳᠤ ᠤᠭᠤᠷᠠᠭ ᠶᠡᠭᠡ ᠠᠭᠤᠯᠤᠭᠳᠠᠵᠤ᠂ ᠵᠠᠰᠠᠭ᠎ᠠ ᠢᠳᠡᠭᠦ ᠨᠢ ᠪᠠᠶ᠎ᠡ ᠶᠢ ᠳᠠᠮᠢᠷᠵᠢᠭᠤᠯᠬᠤ᠂ ᠭᠦᠴᠦᠵᠢᠭᠦᠯᠭᠦ ᠪᠠ ᠴᠢᠬᠢ ᠱᠤᠤᠬᠢᠵᠤ᠂ ᠨᠢᠷᠤᠭᠤ ᠭᠦᠰᠢᠭᠦ ᠶᠢ ᠵᠠᠰᠠᠵᠤ᠂ ᠪᠠᠶ᠎ᠡ ᠶᠢᠨ ᠶᠠᠳᠠᠷᠠᠭ᠎ᠠ ᠶᠢ ᠳᠠᠶᠢᠯᠳᠠᠭ ᠥᠢᠯᠡᠳᠥᠯ ᠲᠠᠢ ᠪᠤᠯᠬᠤᠷ ᠵᠢᠯ ᠳᠤ ᠪᠠᠨ ᠨᠢᠭᠡ ᠢᠳᠡᠵᠤ ᠪᠠᠶ᠎ᠡ ᠶᠢᠨ ᠢᠶᠠᠨ ᠡᠷᠴᠢ ᠭᠦᠴᠤ ᠶᠢ ᠰᠠᠯᠪᠢᠳᠡᠭ ᠤᠴᠢᠷ ᠲᠠᠢ᠃ ᠬᠤᠷᠠᠭᠠᠨ ᠵᠠᠰᠠᠭ᠎ᠠ ᠨᠢ ᠰᠢᠮ᠎ᠡ ᠲᠡᠵᠢᠭᠡᠯᠲᠥ ᠢᠲᠡᠭᠡᠨ᠂ ᠬᠤᠷᠠᠭᠠᠨ ᠵᠠᠰᠠᠭ᠎ᠠ ᠢᠳᠡᠬᠦ ᠶᠢ ︽ᠠᠮᠢᠳᠤ ᠮᠠᠯ ᠢᠳᠡᠨ᠎ᠡ︾ ᠭᠡᠵᠤ ᠭᠡᠯᠴᠡᠳᠡᠭ᠃      ᠬᠤᠷᠠᠭ᠎ᠠ ᠪᠠᠨ ᠬᠦᠩᠭᠡᠯᠡᠵᠤ ᠪᠠᠷᠠᠭᠰᠨ ᠤ ᠲᠠᠷᠠᠭ᠎ᠠ᠂ ᠪᠦᠭᠦᠳᠡ ᠭᠡᠷ ᠲᠡᠭᠡᠨ ᠤᠷᠤᠵᠤ᠂ ᠠᠭᠰᠢᠭᠠᠭᠰᠠᠨᠪᠤᠳᠠᠭ᠎ᠠ᠂ ᠴᠢᠨᠠᠭᠰᠠᠨ ᠮᠢᠬ᠎ᠠ᠂ ᠵᠠᠰᠠᠭ᠎ᠠ ᠪᠠᠨ ᠢᠳᠡᠵᠤ ᠨᠠᠶᠢᠷᠯᠠᠨ᠎ᠠ᠃ ᠵᠠᠰᠠᠭ᠎ᠠ ᠶᠢ ᠢᠳᠡᠬᠦ ᠶᠢᠨ ᠶᠤᠰᠤᠨ ᠳᠤ ᠰᠢᠷ᠎ᠠ ᠲᠤᠰᠤᠨ ᠳᠤ ᠳᠥᠷᠢᠵᠤ ᠢᠳᠡᠬᠦ ᠪᠥᠭᠡᠳ ᠬᠢᠲᠤᠭ᠎ᠠ ᠮᠡᠰᠡ ᠬᠥᠳᠡᠯᠭᠡᠵᠤ ᠬᠠᠭᠠᠯᠵᠤ ᠢᠳᠡᠳᠡᠭ ᠥᠭᠡᠢ᠂ ᠲᠤᠰ ᠡᠳᠥᠷ ᠲᠤᠨᠢ ᠢᠳᠡᠵᠤ ᠳᠠᠭᠤᠰᠬᠠᠳᠠᠭ ᠤᠨ ᠤᠴᠢᠷ ᠨᠢ ᠬᠤᠷᠠᠭᠠᠨ ᠳᠤᠨᠢ ᠬᠥᠩᠭᠡᠨ᠂ ᠰᠠᠶᠢᠨ ᠮᠠᠯ ᠪᠤᠯᠳᠠᠭ᠃ ᠮᠥᠨ ᠪᠠᠰᠠ ᠬᠤᠷᠠᠭᠠᠨ ᠵᠠᠰᠠᠭ᠎ᠠ ᠶᠢᠨ ᠥᠢᠯᠡ ᠶᠠᠪᠤᠭᠳᠠᠭᠰᠠᠨ ᠤ ᠭᠤᠷᠪᠠᠨ ᠡᠳᠥᠷ ᠤᠨ ᠳᠤᠲᠤᠷ᠎ᠠ ᠭᠡᠷ ᠠᠴᠠ ᠶᠠᠭᠤᠮ᠎ᠠ ᠭᠠᠳᠠᠭᠰᠢ ᠭᠠᠷᠭᠠᠳᠠᠭ ᠥᠭᠡᠢ ᠵᠠᠩᠰᠢᠯ ᠲᠠᠢ᠃       ᠵᠠᠰᠠᠭ᠎ᠠ ᠴᠢᠨᠠᠭᠰᠠᠨ ᠱᠦᠯᠦ ᠪᠠᠨ ᠲᠤᠷ᠎ᠠ ᠪᠠᠷ ᠢᠶᠠᠨ ᠠᠰᠬᠠᠳᠠᠭ ᠦᠭᠡᠢ᠂ ᠨᠤᠬᠠᠢ ᠳᠤ ᠦᠭᠳᠡᠭ ᠦᠭᠡᠢ᠂ ᠬᠤᠷᠤᠭ᠎ᠠ ᠬᠦᠷᠢᠶ᠎ᠡ᠂ ᠫᠦᠩᠵᠢ ᠲᠡᠭᠡᠭᠦᠷ ᠢᠶᠠᠨ ᠠᠰᠬᠠᠳᠠᠭ᠃ ᠪᠠᠰᠠ ᠨᠢᠭᠡ ᠰᠤᠨᠢᠷᠬᠠᠯᠲᠠᠢ ᠵᠠᠩᠰᠢᠯ ᠨᠢ ᠬᠤᠷᠠᠭ᠎ᠠ ᠵᠠᠰᠠᠭᠰᠠᠨ ᠬᠦᠮᠦᠨ ᠤ ᠭᠠᠷ ᠤᠭᠢᠶᠠᠭᠰᠠᠨ ᠤᠰᠤ ᠶᠢ ᠬᠤᠨᠤᠭᠤᠲᠠ ᠲᠠᠯᠪᠢᠵᠤ᠂ ᠵᠠᠰᠠᠭᠰᠠᠨ ᠬᠤᠷᠠᠭ᠎ᠠ ᠢᠰᠢᠭᠡ ᠲᠠᠭ᠎ᠠ ᠦᠭᠡᠢ ᠪᠠᠶᠢᠳᠠᠯ ᠢᠯᠡᠷᠡᠪᠡᠯ ᠴᠢᠳᠬᠤᠵᠤ ᠦᠭᠭᠦᠨ᠎ᠡ᠂ ᠢᠩᠬᠢᠪᠡᠯ ᠲᠤᠤᠷ᠎ᠠ ᠪᠠᠨ ᠵᠦᠭᠡᠷ ᠪᠤᠯᠴᠢᠬᠠᠳᠠᠭ ᠠᠵᠠᠢ᠃ ᠬᠦᠩᠭᠡᠯᠡᠭᠰᠡᠨ ᠬᠤᠷᠠᠭ᠎ᠠ ᠢᠰᠢᠭᠡ ᠪᠠᠨ ᠲᠤᠯᠤᠭᠠᠠ ᠬᠤᠨᠤᠭ ᠲᠤᠲᠤᠷ᠎ᠠ ᠤᠰᠤ ᠭᠤᠤᠯ ᠭᠡᠳᠦᠯᠭᠡᠬᠦ ᠦᠭᠡᠢ᠂ ᠴᠤᠬᠢᠵᠤ ᠴᠠᠪᠳᠠᠬᠤ ᠦᠭᠡᠢ᠂ ᠮᠦᠨ ᠡᠳᠦᠷ ᠲᠤᠨᠢ ᠤᠳᠠᠭᠠᠨ ᠬᠡᠪᠳᠡᠭᠦᠯᠬᠦ ᠦᠭᠡᠢ᠂ ᠪᠠᠶᠢᠨ ᠪᠠᠶᠢᠨ ᠪᠤᠰᠬᠠᠵᠤ ᠲᠠᠭᠤᠵᠤ ᠬᠦᠳᠡᠯᠭᠡᠵᠦ ᠪᠠᠶᠢᠳᠠᠭ᠃ ᠢᠩᠬᠢᠪᠡᠯ ᠠᠨᠠᠬᠤ ᠨᠢ ᠬᠤᠷᠳᠤᠨ ᠪᠠᠶᠢᠳᠠᠭ ᠭᠡᠵᠤ ᠬᠡᠯᠡᠳᠡᠭ᠃ ᠢᠰᠢᠭᠡ ᠬᠤᠷᠠᠭ᠎ᠠ ᠬᠦᠩᠭᠡᠯᠡᠬᠦ ᠳᠤ ᠡᠨᠡ ᠵᠢᠯ ᠤᠨ ᠲᠦᠯ ᠠᠴᠠ ᠬᠤᠴᠠ ᠤᠬᠤᠨ᠎ᠠ ᠲᠠᠯᠪᠢᠬᠤ ᠰᠠᠨᠠᠭ᠎ᠠ ᠲᠠᠢ ᠪᠤᠯ ᠰᠢᠯᠢᠨ ᠰᠤᠩᠭᠤᠭᠰᠠᠨ ᠰᠠᠶᠢᠨ ᠤᠳᠤᠮ ᠤᠨ ᠲᠦᠯ ᠢᠶᠠᠨ ᠲᠡᠪᠡᠷᠢᠨ ᠠᠪᠴᠢᠷᠠᠵᠤ᠂ ᠬᠦᠩᠭᠡᠯᠡᠭᠴᠢ ᠶᠢᠨ ᠡᠮᠦᠨ᠎ᠡ ᠬᠦᠷᠭᠡᠨ᠎ᠡ᠃ ᠬᠦᠩᠭᠡᠯᠡᠭᠴᠢ ᠠᠴᠠ ᠲᠡᠷᠡ ᠲᠦᠯ ᠤᠨ ᠡᠷᠡᠤ᠂ ᠮᠠᠩᠨᠠᠢ᠂ ᠡᠪᠡᠷ ᠲᠤᠭᠤᠷᠠᠢ ᠳᠤ ᠨᠢ ᠲᠤᠰᠤ ᠪᠤᠶᠤ ᠰᠦ ᠴᠠᠭ᠎ᠠ ᠲᠦᠷᠬᠢᠵᠤ ᠮᠢᠯᠢᠶᠠᠭᠠᠳ ︽ᠲᠦᠮᠡᠨ ᠬᠤᠨᠢᠨ ᠤ ᠲᠦᠷᠦᠭᠦᠤ᠂ ᠮᠢᠩᠭᠠᠨ ᠬᠤᠨᠢᠨ ᠤ ᠮᠠᠩᠯᠠᠢ ᠪᠤᠯᠤᠭ︾ ᠭᠡᠵᠤ ᠢᠷᠦᠭᠡᠨ᠎ᠠ᠃ ᠵᠠᠷᠢᠮ ᠨᠤᠲᠤᠭ ᠲᠤ ᠪᠠᠰᠠ ᠮᠢᠯᠢᠶᠠᠭᠠᠳ ︽ᠠᠷᠴᠠ᠂ ᠬᠦᠵᠢ᠂ ᠠᠭᠢ ᠤᠩᠭᠤᠰᠬᠠᠭᠰᠠᠨ ᠰᠠᠩ ᠪᠤᠶᠤ ᠬᠤᠪᠤᠩ ᠢ ᠭᠤᠷᠪᠠᠨᠳᠠ ᠲᠤᠭᠤᠷᠢᠭᠤᠯᠵᠤ︾ ᠢᠷᠦᠭᠡᠭᠡᠳ ᠰᠦᠷᠦᠭ ᠲᠤᠨᠢ ᠨᠡᠶᠢᠯᠡᠭᠦᠯᠳᠡᠭ ᠪᠠᠶᠢᠨ᠎ᠠ᠃      ※ ᠲᠤᠰ ᠵᠤᠬᠢᠶᠠᠯ ᠨᠢ ᠨᠤᠲᠤᠭ ᠤᠨ ᠪᠤᠭᠤᠷᠤᠯ ᠭᠡᠩᠰᠡᠩᠫᠢᠯ ᠨᠠᠰᠤᠲᠠᠨ ᠤ ᠶᠠᠷᠢᠶ᠎ᠠ ᠶᠢ ᠡᠮᠬᠢᠳᠬᠡᠨ᠂ ᠡᠷᠳᠡᠮᠳᠡᠨ ᠰᠠᠷᠠᠩᠭᠡᠷᠡᠯ ᠤᠨ ᠵᠤᠬᠢᠶᠠᠭᠰᠠᠨ ︽ᠮᠤᠩᠭᠤᠯ ᠤᠭᠰᠠᠭᠠᠲᠠᠨ ᠤ ᠵᠠᠩᠰᠢᠯ ᠰᠤᠶᠤᠯ ᠤᠨ ᠦᠨᠳᠦᠰᠦ︾ ︵ᠪᠡᠭᠡᠵᠢᠩ ᠤᠨ ᠦᠨᠳᠦᠰᠦᠲᠡᠨ ᠤ ᠰᠤᠶᠣᠯ ᠤᠨ ᠬᠡᠪᠯᠡᠯ ᠤᠨ ᠬᠤᠷᠢᠶ᠎ᠠ᠂ 2011 ᠤᠨ︶ ᠭᠡᠬᠦ ᠨᠤᠮ ᠤᠨ ᠲᠠᠪᠤᠳᠤᠭᠠᠷ ᠪᠦᠯᠦᠭ ᠤᠨ ᠬᠤᠷᠠᠭ᠎ᠠ ᠬᠦᠩᠭᠡᠯᠡᠬᠦ ᠶᠤᠰᠤ ᠵᠠᠩᠰᠢᠯ ᠭᠡᠬᠦ ᠵᠤᠬᠢᠶᠠᠯ ᠢᠶᠠᠷ ᠬᠢᠨᠠᠯᠲᠠ ᠪᠤᠯᠭᠠᠪᠠ᠃                                          ︵ᠤᠯᠠᠭᠠᠨᠴᠢᠯᠠᠭᠤ ᠡᠮᠬᠢᠳᠭᠡᠨ ᠨᠠᠶᠢᠷᠠᠭᠤᠯᠪᠠ︶
 
ᠢᠷᠡᠯᠲᠡ᠄ ᠣᠯᠠᠭᠠᠨᠴᠠᠪ  ᠤᠨ ᠰᠣᠨᠢᠨ
 
 
ᠬᠠᠮᠢᠶ᠎ᠠ ᠪᠥᠬᠦᠢ ᠰᠤᠨᠢᠨ
  
ᠮᠣᠩᠭᠤᠯᠴᠤᠳ ᠤᠨ ᠠᠮᠲᠠ ᠭᠠᠷᠭᠠᠬᠤ ᠶᠣᠰᠣᠨ
ᠠᠷᠢᠭᠤᠨ ᠴᠡᠪᠡᠷ ᠠᠶᠢᠯ ᠳᠤ ᠠᠵᠠ ᠵᠢᠷᠭᠠᠯ ᠲᠣᠭᠲᠠᠳᠠᠭ
ᠮᠤᠩᠭᠤᠯᠴᠤᠳ ᠤᠨ ᠰᠠᠭᠤᠬᠤ ᠰᠤᠶᠤᠯ ᠤᠨ ᠲᠤᠬᠠᠢ
ᠲᠠᠪᠤᠨ ᠥᠩᠭᠡ ᠶᠢᠨ ᠬᠠᠳᠠᠭ ᠨᠢ ᠶᠠᠭᠤ ᠶᠠᠭᠤ ᠶᠢ ᠪᠡᠯᠭᠡᠳᠡᠳᠡᠭ ᠪᠤᠢ︖
ᠮᠤᠩᠭᠤᠯᠴᠤᠳ ᠤᠨ ᠮᠡᠨᠳᠣᠯᠡᠬᠦ ᠶᠤᠰᠤᠨ ᠤ ᠲᠤᠬᠠᠢ ᠲᠤᠪᠴᠢ ᠲᠠᠶᠢᠯᠤᠮᠵᠢ
ᠥᠪᠦᠷ ᠮᠣᠩᠭᠤᠯ ᠤᠨ ᠥᠪᠡᠷᠳᠡᠭᠡᠨ ᠵᠠᠰᠠᠬᠤ ᠣᠷᠣᠨ ᠤ ᠠᠷᠠᠳ ᠤᠨ ᠵᠠᠰᠠᠭ ᠤᠨ ᠣᠷᠳᠣᠨ ᠠᠴᠠ ᠭᠤᠤᠯᠴᠢᠯᠠᠨ ᠡᠷᠬᠢᠯᠡᠪᠡ ᠥᠪᠦᠷ ᠮᠣᠩᠭᠤᠯ ᠤᠨ ᠥᠪᠡᠷᠳᠡᠭᠡᠨ ᠵᠠᠰᠠᠬᠤ ᠣᠷᠣᠨ ᠤ ᠠᠷᠠᠳ ᠤᠨ ᠵᠠᠰᠠᠭ ᠤᠨ ᠤᠷᠳᠤᠨ ᠤ ᠠᠯᠪᠠᠨ ᠲᠢᠩᠬᠢᠮ ᠠᠴᠠ ᠲᠠᠭᠠᠭᠠᠴᠢᠯᠠᠨ ᠡᠷᠬᠢᠯᠡᠪᠡ ᠃ ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠮᠡᠷᠭᠡᠵᠢᠯ ᠬᠠᠩᠭᠠᠪᠠ᠃ ᠰᠢᠤᠳᠠᠨ ᠳ᠋ᠤᠭᠠᠷ: 010098    蒙ICP备05000248号